Sautján ára íþróttastjarna drepin í loftárás Rússa

Óskar Ófeigur Jónsson skrifar 20. nóvember 2025 06:32

Karyna Bakhur vann mörg verðlaun á ferli sínum en ætlaði sér líka að verða þjálfari. : Natalyne Village Military Administration

Karyna Bakhur, sautján ára meistari í sparkboxi og kósakkabardaga, féll í rússneskri árás á bæinn Berestyn í Kharkiv-héraði í Úkraínu. Þrátt fyrir tilraunir lækna til að bjarga henni lést Karyna af sárum sínum eftir að hafa fengið í sig sprengjubrot.

Karyna var íþróttameistari, háskólanemi sem lærði til íþróttakennara og vann með ungum börnum. Hún hafði í hyggju að verða þjálfari.

Vitalii Bakhur, faðir Karynu, sagði að nokkrar árásir hefðu orðið nálægt heimili þeirra um nóttina. Eftir fyrstu þrjár fór fjölskyldan en sneri aftur heim. Þau voru of snemma á ferðinni. Þegar nýjar sprengingar urðu um fimmtíu metra frá húsinu voru Vitalii og Karyna í garðinum.

Var einum og hálfum metra frá mér

„Ég særðist ásamt henni, á fæti og brjósti. Karyna var einum og hálfum metra frá mér. Kannski skýldi hún mér jafnvel með líkama sínum. Á meðan ég keyrði með Karynu á sjúkrahúsið var hún meðvitundarlaus, opnaði aðeins augun af og til. Þeir vildu leggja mig inn en ég neitaði. Hvernig get ég lagst í sjúkrarúm þegar ég þarf að jarða dóttur mína?“

Þjálfari Karynu, Volodymyr Zibarov, sagði að hún hefði verið á þriðja ári í kennaraháskóla og einnig unnið með hóp barna á aldrinum sex til sjö ára.

„Karyna hafði gríðarlega möguleika og börnunum þótti mjög vænt um hana. Jafnvel mín eigin dóttir æfði með henni. Karyna var ákveðin og markviss en á sama tíma mjög þokkafull. Hún var sönn kósakkastelpa,“ sagði Volodymyr Zibarov.

Heimsbikarmót fram undan í Austurríki

Volodymyr bætti við að ungu iðkendur Karynu ættu von á keppni þar sem hún átti að þreyta frumraun sína sem þjálfari. „Við áttum að fara í kvöld á heimsbikarmótið í Austurríki. Blóðug rússnesk eldflaug tók Karynu einfaldlega frá okkur degi fyrr,“ sagði Zibarov.

Hernaðarstjórn Natalyne-þorps sagði áður að Karyna hefði hafið íþróttaferil sinn sjö ára gömul og æft hjá her- og íþróttafélaginu Peresvit.

Hún vann sín fyrstu landsverðlaun á unglingsárum og keppti síðar fyrir Úkraínu á alþjóðavettvangi. Hún var Úkraínumeistari í kósakkabardaga og sparkboxi.

Hún var einnig Evrópumeistari (2023 og 2025) og verðlaunahafi á heimsmeistaramótinu (2023) og Evrópumeistaramótinu (2024) í kósakkabardaga.

Karyna hefði orðið átján ára þann 5. desember næstkomandi.