Skiptir úr sál­fræðinni í Duolingo

„Stuttu eftir EM hafa þau samband og þetta gerðist frekar fljótt eftir það,“ segir Elín um áhuga þýska liðsins. Hún segist ávallt hafa stefnt á atvinnumennsku en það sé þó snúið að yfirgefa lið Vals.

„Já og nei. Maður stefndi alltaf að þessu. En samt er ótrúlega erfitt að fara úr búbblunni hérna í Val þar sem maður hefur verið í sex ár. Og að fara frá fjölskyldunni og svona. En það er mjög gott að hafa Andreu og Díönu þarna,“ segir Elín.

Líkt og hún nefnir þá hittir hún hjá þýska liðinu þær Díönu Dögg Magnúsdóttur og Andreu Jacobsen sem leika með henni í landsliðinu. Það hjálpi til þegar stórt stökk er tekið úr heimahögunum.

„Ég er búin að tala við þær báðar og fá allskonar svör við hinum ýmsu spurningum og góð ráð við hlutum sem maður sjálfur hugsaði ekkert endilega út í. Það verður mjög gott að hafa þær,“

„Ég náttúrulega kann ekki stakt orð í þýsku. Díana er sleip þar þannig að hún hefur hjálpað mjög mikið til við að þýða allskonar og það hefur komið sér mjög vel,“

Þú verður á Duolingo næstu mánuðina?

„Já, ég er strax byrjuð,“ segir Elín og hlær.

Klárar stakan áfanga samhliða atvinnumennskunni

Elín Rósa hefur verið burðarás í liði Vals sem hefur raðað inn titlum undanfarin ár. Hún klárar megnið af sálfræðigráðu við HÍ í sumar og segir nú rétta tímapunktinn til að breyta til.

„Ég hugsaði þetta alveg líka fyrir síðasta tímabil. En þetta er ghóður tímapunktur varðandi námið mitt, sem ég er að klára. Líkamlega og andlega finnst mér ég meira tilbúin núna og finnst ég vera á þeim stað núna að taka næsta skref,“ segir Elín sem er á þriðja ári í sálfræði við Háskóla Íslands en mun eftir vorönnina eiga stakan áfanga eftir sem hún vonast til að klára í haust.

„Ég mun eiga einn áfanga eftir. Það er smá vesen en vonandi reddast.“

Lært margt á Hlíðarenda

Elín Rósa er 22 ára en hefur verið hjá Val frá árinu 2019. 16 ára gömul skipti hún þangað frá Fylki en segir að erfitt verði að kveðja Valskonur eftir góðan tíma þar.

„Það er mjög erfitt. Þetta er orðið mjög mikið comfort zone. Síðustu sex ár hafa verið frábær. Ég hef fengið ótrúlega góð tækifæri og er þakklát fyrir það. Gústi [Ágúst Jóhannsson, þjálfari Vals] er búinn að vera öll þessi ár og hefur kennt mér ótrúlega margt og svo náttúrulega Dagur [Snær Steingrímsson, aðstoðarþjálfari liðsins] líka og allir aðrir sem koma að þessu,“ segir Elín

Vonast til að kveðja með Evróputitli

Þrátt fyrir að skiptin í Bundesliguna liggi fyrir er nóg eftir af tímabilinu hér heima. Valskonur eru á toppi Olís-deildarinnar og komnar í undanúrslit EHF-bikarsins. Tap í undanúrslitum bikarkeppninnar á dögunum sitja þó aðeins í Elínu.

„Klárlega. Þetta var frekar súrt en það er nóg eftir. Við stefnum á að taka næstu titla. Það er tengt frammistöðunni þannig að við einblínum á frammistöðuna. Bara á næstu æfingu og næsta leik sem er alltaf það mikilvægasta,“ segir Elín.

Það væri ekki amalegt að kveðja með Íslandsmeistaratitli og hvað þá Evróputitli?

„Nei, það væri ekki leiðinlegt. En maður tekur einn dag í einu, það er ekki hægt að fara fram úr sér,“ segir Elín.

Viðtalið má sjá í heild í neðri spilaranum.