Dómstólaráð Líbíu endurskoðar dauðadóm á mánudaginn

Dómstólaráð Líbíu mun koma saman á mánudaginn 16. júlí og ákveða örlög sexmenninganna. Dauðadómur yfir þeim var staðfestur í morgun. Dómstólaráðið ákvað að taka málið að sér og getur mildað dóminn eða náðað fólkið. Embættismenn í Líbíu segja það þó háð samkomulagi um bætur fyrir fjölskyldur þeirra barna sem smituðust svo að þær geti borgað fyrir umönnun barna sinna.

Seint í gærkvöldi tilkynnti Gaddafi-stofnunin, sem hefur gegnt hlutverki sáttasemjara í deilunni, því yfir að sátt hefði náðst um bætur handa fjölskyldum þeirra barna sem smituðust af HIV árið 1998. Talið er að meiningin með þeirri yfirlýsingu hafi verið að lægja öldurnar í alþjóðasamfélaginu og gefa til kynna að fólkið yrði náðað.

Evrópusambandið hefur lýst yfir vonbrigðum sínum að hæstiréttur Líbíu staðfesti dauðadóminní morgun. Þeir sögðust þó vonast eftir því að farsæl lausn næðist í málinu von bráðar. Forseti Búlgaríu, en fimm starfsmannanna koma þaðan, sagðist vonast til þess að dómstólaráðið, sem dómsmálaráðherra Líbíu situr yfir, myndi náða fólkið. Smellið á „Spila" hnappinn til þess að sjá myndband af fólkinu í hæstarétt landsins.

Heilbrigðisstarfsfólkið hefur setið í fangelsi síðan árið 1999 en smitin áttu sér stað árið 1998. Líbía var lengi vel í alþjóðlegri einangrun vegna kjarnorkuáætlunar sinnar. Árið 2003 gaf landið hana síðan upp á bátinn en hefur síðan þurft að glíma við afleiðingar HIV málsins.

Fólkið var sakfellt fyrir að hafa gefið börnunum blóð sem þau vissu að væri HIV-sýkt í þeim tilgangi að reyna að finna lækningu við AIDS. Það segist hafa verið pyntað þar til það gekkst við verknaðinum. Sumar hjúkrunarkonurnar segja að þeim hafi verið nauðgað til þess að fá þær til þess að játa. Opinberlega hafa þau ávallt haldið fram sakleysi sínu.

Fyrsti dómurinn féll í málinu árið 2004 og var fólkið þá dæmt til dauða. Hæstiréttur landsins lét rétta aftur í málinu og nú rétt fyrir jól varð niðurstaðan sú sama. Þau áfrýjuðu þá og nú hefur dauðadómurinn verið staðfestur af hæstarétti landsins. Fólkið var ekki viðstatt dómsuppkvaðninguna í morgun.

Óháðir sérfræðingar gerðu rannsókn á málinu og niðurstaða þeirra var að börnin hefðu smitast áður en fólkið kom til starfa í landinu. Margir segja Muammar Gaddafi, forseta landsins, vera að reyna að breiða yfir galla í heilbrigðiskerfinu með því að sækja fólkið til saka.