„Eins manns dauði er annars brauð“

Ís­land er á toppi síns riðils í undan­keppninni eftir sigur í fyrstu tveimur leikjum sínum en óhætt er að segja að liðið mæti ansi laskað til leiks í leikina tvo gegn Grikkjum í næstu viku.

Sex­tán manna lands­liðs­hópur Ís­lands fyrir tvo leiki gegn Grikkjum í undan­keppni EM var opin­beraður í gær og við það til­efni sagði Snorri Steinn, lands­liðsþjálfari að það hefði verið bras að koma honum heim og saman.

Sé tekið mið af meiðsla­lista lands­liðs­manna er það vel skiljan­legt orða­val. Kanónur úr þýsku deildinni á borð við Gísla Þor­geir Kristjáns­son, Ómar Inga Magnús­son, Elvar Örn Jóns­son og Viggó Kristjáns­son vantar og þá er Bjarki Már Elís­son ekki í hópnum og listinn ekki tæmandi.

„Meira vesen en oft áður og meiri óvissa,“ segir Snorri Steinn um lands­liðsvalið að þessu sinni. „Menn hafa bara verið meiddir, margir lykil­menn sem voru í óvissu þegar að ég var að velja hópinn og svo var helgin ekkert eitt­hvað frábær fyrir mig. Ég hélt það væri að rofa til en það var það bara ekki. Þá þarf maður bara að glíma við það. Það er bara partur af mínu starfi, sem og partur af því að vera hand­bolta­maður, meiðsli. Þetta er staðan eins og hún er núna. En eins og alltaf þegar að maður velur liðið, þá er bara fínt að koma því frá sér og nú er ég búinn að því. Þá er bara að vona að drengirnir komist í gegnum þessa leiki sem þeir eiga eftir fram að þessu verk­efni og að við getum farið að ein­beita okkur að því.“

Elvar Örn mesta sjokkið

Snorri hafði ekki tölu á því hversu marga mögu­lega lands­liðs­hópa hann hafði teiknað upp í að­dragandanum en staðan olli því að símtölin í Arnór Atla­son, að­stoðar­lands­liðsþjálfara, voru ívið fleiri en fyrir hefðbundin verk­efni.

„Þetta er bara ein­hver haus­verkur sem maður þarf að tækla, aðeins fleiri símtöl í Arnór heldur en venju­lega til að ræða hluti. Það var meira um ef spurningar hjá okkur. „Ef þessi er ekki með hvað gerum við þá?“ en við vorum með alls konar plön í gangi og núna rétt fyrir fund negldum við þetta.

„Elvar Örn var kannski mesta sjokkið, það gerist náttúr­lega bara í síðasta leik og hann var heill heilsu fram að því á meðan að Viggó, Ómar og Teitur, hafa bara verið að glíma við meiðsli sem og Bjarki. Ég svo sem vissi af því, vissi að það gæti brugðið til beggja vona með þá. Núna er ég búinn að velja hópinn, við göngum út frá því og þá er kannski loksins hægt að fara huga meira að leik­planinu. Því sem við ætlum að gera í leikjunum.“

„Þegar tækifærið gefst þarftu að negla það“

Ef reynt er að horfa á jákvæðar hliðar má segja sem svo að í komandi verk­efni felist þá tækifæri fyrir aðra leik­menn til að stíga upp.

„Það er alltaf þannig þegar að þú kemur inn í lands­liðið að það er tækifæri til að sýna sig og sanna. Það er nú bara þannig í þessum bransa að eins manns dauði er annars brauð. Þegar tækifærið gefst þá þarftu að negla það. Þau eru ekkert enda­laus, tala nú ekki um í lands­liðs­bolta þar sem eru fáir gluggar og tíminn lítill. Auðvitað er þetta tækifæri fyrir menn en á sama tíma þurfum við sem lið að gera vel. Vinna þessa leiki og koma okkur í góða stöðu til að vinna riðilinn.“

Fyrri leikurinn gegn Grikkjum er spilaður í Chalkida í Grikk­landi miðviku­daginn 12. mars en þremur dögum síðar mætast liðin svo öðru sinni hér heima. Tveir sigrar í þessum leikjum koma Ís­landi í afar góða stöðu á toppi riðilsins og EM sætið þá nær öruggt.

„Við gerum sjálfir þá kröfu að vinna þá tvisvar. Þetta er lið sem var á EM, lið sem spilaði hörku leik gegn Bosníu í síðasta glugga, vann Svart­fjalla­land tvisvar sinnum í janúar auðveld­lega í æfingar­leikjum. Við þurfum bara að vanda okkur. Það eru breytingar, þetta er öðru­vísi hópur og lið heldur en var á HM. Við getum því ekki labbað inn í ein­hverja hluti frá því í janúar. Við þurfum að mæta grimmir og ein­beittir til leiks, fyrir okkur sjálfa að sýna ákveðinn standard. Sýna að við séum betri en þessar þjóðir og gera það vel. Mér finnst það líka bara partur af ein­hverri veg­ferð sem við viljum meina að við séum á sem lið, að spila alla leiki al­menni­lega, gera það vel og sýna frammistöðu.“