Enginn í bann en ummæli Björgvins Páls fara fyrir aganefnd

Eftir leikinn gegn Fram, sem Valur vann með tíu marka mun, 34-24, gaf Björgvin Páll í skyn að leikmenn Fram hefðu skotið viljandi í höfuð sitt.

„Ég átti von á að þeir myndu berja okk­ur í and­litið og ég átti von á því að þeir fengju rautt spjald. Ég átti von á því að fá bolt­ann yfir haus­inn og í haus­inn. Þetta er það sama og gerðist í síðasta leik og það eru skýr skila­boð. Þeir ætla að fara þannig út,“ sagði Björgvin við mbl.is eftir leikinn á Hlíðarenda í gær.

„Annaðhvort gera þeir þetta vilj­andi eða eru svona lé­leg­ir. Ég veit þeir eru góðir hand­bolta­menn, svo það hlýt­ur að vera það fyrra. Ég er bú­inn að fá fjög­ur skot í haus­inn frá þeim í tveim­ur leikj­um. Þeir vita að ég fékk skot í haus­inn um dag­inn og það er um að gera að keyra á það þá. Þetta er mjög skyn­sam­legt hjá þeim. Það eru skýr skila­boð að skjóta yfir haus­inn á mér eða í haus­inn á mér. Þeir verða að svara fyr­ir það.“

Framkvæmdastjóri HSÍ sendi erindi fyrir hönd stjórnar sambandsins til aganefndar vegna ummæla Björgvins. Handknattleiksdeild Vals hefur frest til klukkan 11:00 til að skila inn greinargerð vegna málsins.

Annar leikur Vals og Fram verður í Safamýrinni á sunnudaginn kemur. Ef allt fer á versta veg gæti Björgvin Páll misst af leiknum. Með sigri í honum tryggja Valsmenn sér sæti í undanúrslitum.

Þorsteinn Gauti Hjálmarsson og Arnór Snær Óskarsson fengu báðir rautt spjald í leiknum á Hlíðarenda en sleppa við leikbann. Sömu sögu er að segja af Degi Arnarssyni, leikmanni ÍBV, sem var rekinn út af í sigrinum á Stjörnunni, 35-26, í Eyjum í gær.