„Það eru bara forréttindi að fá að skoða þetta og það eru margir úti í heimi sem reyna að fá að skoða þetta en það fá ekki allir þetta tækifæri. Það er bara magnað að fá að sjá þetta og komast svona nálægt þessu,“ segir Steinn í samtali við fréttastofu.
„Við vorum alveg að bugast en svo komumst við að þessu á endanum og þá fengum við okkur að borða og fylgdumst með þessu.“
Þeir hafi í kjölfarið farið alveg upp að hrauninu og reynt að taka mið af vindátt til að gæta sín á gosmenguninni og hitanum.
„Við töldum okkur ekki vera í neinni hættu svo sem,“ segir Steinn sem fann vissulega fyrir hitanum frá hrauninu.
„Það spýttist svolítið úr þessu en ekkert að okkur eða nálægt.“
Gunnar Árnason var einnig með í för og náði mögnuðu myndbandi sem má sjá hér fyrir neðan.
Alls ekki síðasta gosferðin
Steinn segir félagana hafa verið í um tvær klukkustundir á svæðinu og að þeir hafi ekki verið komnir aftur að bílnum fyrr en klukkan sex í morgun.
Þið hafið ekkert verið smeykir við þetta og að þið væruð að hætta ykkur of nærri?
„Nee, svo sem ekki. Við vorum auðvitað þarna algjörlega á okkar ábyrgð,“ segir Steinn sem gengst um leið við því að vera ákveðinn áhættufíkill.
„Jaaá, maður sækist smá í adrenalínið. Það er bara gaman að því og maður lifir hvort eð er bara einu sinni.“
Steinn segist vera viss um að hann hafi þarna búið til kærkomna minningu og er staðráðinn í því að þetta verði ekki hans síðasta ferð á virkt gossvæði.
„Alltaf þegar það verður gos þá ætlar maður að verða viðstaddur, það er alveg bókað.“
Að neðan má sjá leiðbeiningar frá almannavörnum fyrir þá sem hyggja á göngu að gosstöðvunum.
Vegna umferðar nærri gosstöðvum í Geldingadal – Hvað ber að varast?
Leiðbeiningar til almennings
Utanvegaakstur er ólöglegur.
*Þetta á við um öll vélknúin ökutæki, svo sem fjórhjól, sexhjól, mótorhjól.
Það er mögulegt að leggja í Grindavík og við Bláa Lónið og ganga þaðan helgina 20.-21.3.
*Ferðin frá bílastæði tekur 4-6 klukkustundir og er eingöngu fyrir fólk sem vant er útivist í erfiðum aðstæðum.
Veður getur breyst á skömmum tíma. Það er kalt og blautt og spáð roki um helgina.
*Vertu í gönguskóm, hlýjum og vatnsheldum fatnaði.
*Gerðu ráð fyrir því að ferðin geti tekið lengri tíma en áætlað er.
*Vertu með nesti og vatn að drekka.
*Fylgstu vel með ferðafélögunum. Þreyta og ofkæling kemur fljótt.
*Haldið ykkur við fell og hryggi. Forðist dali og dældir í landslaginu.
*Það er hætta á grjóthruni. Varist brattar hlíðar.
Það þarf ekki mikið út af að bregða til að villast.
*Vertu með staðsetningartæki.
Símasamband á svæðinu er slæmt og getur þá orðið erfitt að kalla á hjálp ef þörf krefur.
Gosstöðvar geta breyst og nýjar gossprungur mögulega opnast með litlum fyrirvara.
Gasmengun er mest nálægt svæðinu og getur leynst í dölum og dældum þar sem það er sérlega varasamt. Gasmengun getur breyst með litlum fyrirvara ef gosið eykst skyndilega og varasamt að vera nálægt gosstöðvunum án mælitækja.
*Fólk á alltaf að halda sig undan vindi. Það þýðir að fólk á að vera með vindinn í bakið þegar það gengur að gosstöðvunum og í fangið þegar það gengur til baka.
*Gasmengunin sést ekki og fylgir ekki endilega þeim sýnilega gasmekki á svæðinu.
*Gasmengun getur verið lyktarlaus og þá er erfitt að verjast henni.
*Gasmengun getur loðað við þó sýnilegur gosmökkur sé breyttur með breyttri vindátt
*Grímur sem notaðar eru til sóttvarna veita enga vörn gegn gasmengun.
*Ef þið finnið fyrir minnstu heilsufarseinkennum þá skulið þið forða ykkur strax með vindinn í fangið.
