Leikmenn Thunder voru í verslunarmiðstöð þar sem skotárás átti sér stað

Leikmenn NBA-liðsins Oklahoma City Thunder voru staddir í Penn Square-verslunarmiðstöðinni í Oklahoma City er maður var skotinn þar inni.

Leikmenn NBA-liðsins voru á einkasýningu á kvikmynd er skotárásin átti sér stað. Öryggisverðir liðsins vissu strax af málinu og félagið segir að leikmenn hafi aldrei verið í hættu.

Tveir einstaklingar lentu í rifrildi í skóbúð sem endaði með því að annar þeirra dró upp byssu og skaut hinn aðilann í brjóstið. Sá liggur þungt haldinn á spítala.

Verslunarmiðstöðinni var læst en byssumaðurinn náði að flýja áður en hurðunum var lokað. Hans er enn leitað.