Hláturinn lengir lífið

Vísindin efla alla dáð. Og þau leysa á endanum allar ráðgátur. Nú hafa þau til dæmis nýskeð svarað þeirri áleitnu spurningu hvers vegna aldrað fólk er alltaf svona glatt í geði.

Hver er skýringin á því að við sjáum svo til eingöngu brosmild andlit á elliheimilum? Jú, samkvæmt frásögn vísindafréttaritsins New Scientist fyrir nokkrum dögum er skýringin sú að þetta fólk hefur alla sína ævi verið létt í lund og hlegið reglulega af hjartans lyst. Þegar við svipumst um og undrumst að sjá hvergi aldraða með önugan svip er ástæðan sú að þeir eru flestir hrokknir upp af. Það lengir nefnilega lífið umtalsvert að hlæja og hafa gaman af tilverunni.

Þetta er svosem ekki ný uppgötvun. Alþýðuspekin í málshættinum segir: "Hláturinn lengir lífið". Og þegar fræðimaðurinn Michael Miller við læknisfræðimiðstöð Maryland-háskóla fór að grafast fyrir um hvort þessi speki væri á rökum reist komst hann að því að svo er. Í mikilli rannsóknarritgerð sýnir hann fram á að hlátur auki blóðstreymi um líkamann og fái okkur til að slaka á. Hann ályktar að góður hlátur sé ígildi reglulegrar líkamsræktar. "Þrjatíu mínútur af líkamsrækt þrisvar í viku og fimmtán mínútur af hjartanlegum hlátri á hverjum degi" - þetta er uppskriftin að langlífi samkvæmt niðurstöðu Miller. Grein hans í heild má lesa í New Scientist 12. mars sl.

Við Íslendingar þurftum svo sem ekkert að láta amerískan vísindamann segja okkur þetta. Hér eru starfandi samtök sem halda úti frábærri vefsíðu, hlatur.is, og er markmið þeirra eftirfarandi:

- að opna augu fólks fyrir mikilvægi hláturs á öllum aldursskeiðum!

- að opna augu fólks fyrir mikilvægi hláturs og húmors í uppeldi barna og unglinga!

- að opna augu hjóna/sambýlisfólks  fyrir mikilvægi hláturs á heimilum!

- að vekja athygli fólks á mikilvægi þess að hlæja með öldruðu fólki!

- að opna augu fólks fyrir mikilvægi hláturs á vinnustöðum!

- að hvetja alla til að hlæja meira í daglegu lífi!

- að taka þátt í að kynna nýjustu rannsóknir á hlátri og húmor!

- að taka þátt í fræðslu um hlátur og húmor sem fyrirbyggjandi lífsmáta!

- að taka þátt í fræðslu um hlátur og húmor í meðferðarskyni!

- að taka virkan þátt í að kynna hláturjóga fyrir landsmönnum!

- að vekja athygli fólk á mikilvægi þess að hlæja á erfiðum tímum!

- að standa fyrir árlegri hlátursmiðju með vel þekktum hláturvísindamönnum!

Og ekki væri nú verra ef einhverjir lesendur gaukuðu að okkur skemmtilegum bröndurum hér að neðan. Orðið er laust.