Öll börn eigi að fá að vera hluti af liðinu

Fjöldi barna, foreldra og þjálfara fer á kostum í auglýsingunni sem má sjá að neðan.

Markmið vitundarvakningarinnar er að fjölga tækifærum fyrir börn með fötlun til að taka þátt í skipulögðu íþróttastarfi í sínu nærumhverfi. Með vitundarvakningunni vilja Allir með hvetja íþróttafélög og þjálfara til að kynna sér það starf sem er í gangi víða um land og vekja athygli almennings á mikilvægi þess að öll börn fái tækifæri til að vera með. Í dag stundar aðeins eitt af hverjum tíu börnum með fötlun íþróttir.

Rauður dregill í Laugardalshöll

Á frumsýningarviðburðinum var lögð áhersla á mikilvægi þess að öll börn fái að taka þátt í íþróttastarfi á eigin forsendum og í sínu nærumhverfi.

„Að sjálfsögðu skipta máli mannvirki, fjármagn og átak eins og þetta. En fyrst og fremst þurfum við, hvert og eitt okkar, að líta í eigin barm. Hvernig er mitt viðhorf? Hverju get ég breytt? Er eitthvað sem ég get lagt af mörkum til að auka tækifæri fyrir aðra? Breytum þessu samfélagi. Höfum það bara sjálfsagt og eðlilegt að allir taki þátt í íþróttum,“ sagði Sólný Ingibjörg Pálsdóttir, móðir iðkanda, í ræðu sinni á viðburðinum.

„Allir með er mjög gott dæmi um það hvernig hægt er að vinna hlutina saman. Að verkefninu koma þrjú ráðuneyti, öll íþróttahreyfingin, sveitarfélögin og íþróttafélögin, allt svo að börn geti, á sínum forsendum og í sínu nærumhverfi, tekið þátt og verið hluti af liðinu,“ sagði Willum Þór Þórsson, forseti ÍSÍ.

„Við þurfum að skapa rými fyrir öll börn. Til þess að tækifærin séu raunveruleg þá þarf fleira að koma til en gott boð um að mæta á staðinn. Aðstaðan þarf að vera aðgengileg, þjálfarar þurfa stuðning og fjölskyldur þurfa upplýsingar um það sem stendur til boða. Þar skiptir samstarfið öllu máli,“ sagði Inga Sæland, mennta- og barnamálaráðherra, í ávarpi sínu.

Rannsóknir á hreyfingu íslenskra barna með þroskahömlun hafa sýnt að þau hreyfa sig minna eftir skóla en jafnaldrar þeirra. Sömu rannsóknir sýna einnig að fjarlægð heimili frá æfingaaðstöðu getur verið stór þröskuldur fyrir þátttöku. Niðurstöðurnar undirstrika mikilvægi þess að tryggja öllum börnum aðgengi að íþrótta- og tómstundastarfi í sínu nærumhverfi.

Allir með er samstarfsverkefni Íþrótta- og Ólympíusambands Íslands (ÍSÍ), Ungmennafélags Íslands (UMFÍ) og Íþróttasambands fatlaðra (ÍF), sem sett var á fót árið 2023 með stuðningi þriggja ráðuneyta.