Arnar um pressuna: „Það vilja allir núna vera með hnífana úti“

Stefán Árni Pálsson skrifar 29. september 2026 08:01

Arnar Gunnlaugsson ætlar sér að vinna leikinn í kvöld. vísir/sigurður

„Þetta var alveg nett þunglyndið eftir leikinn á laugardaginn. Eins og á að vera eftir vonbrigðaúrslit. Svo horfum við á leikinn aftur og að mörgu leyti var hann nokkuð góður. Það voru móment sem við hefðum getað gert miklu betur,“ segir Arnar Gunnlaugsson á Stade de Luxembourgh í gær fyrir leikinn gegn heimamönnum í Þjóðadeildinni í kvöld.

„Ég þarf bara að telja strákunum trú um að halda áfram og laga það sem fór verr og mér fannst svona eins og okkur langaði þetta of mikið, langaði að sýna í hverri einustu sókn, hverri einustu varnarfærslu hvað við værum orðnir góðir. Og á þessu leveli þá þarf bara ein, tvö móment og þér er refsað.“

Klippa: Arnar Gunnlaugsson finnur fyrir pressunni

Hann segir að leikmenn liðsins séu allir vanir töluverðri pressu.

„Ég held að þessir strákar séu búnir að vera undir pressu aðallega frá sjálfum sér, frá því þeir voru sex mánaða. En þetta er árangursbransi sem ég geri mér grein fyrir. En þú verður að finna einhvern veginn stað í hjartanu til að geta slakað á líka inn á milli og ekki fara of hátt upp þegar vel gengur og ekki allt of langt niður þegar illa gengur. Við fengum stig og ég minnti líka strákana á það í gær að þetta er deildarkeppni, þetta er ekki bikar þannig að staðan er ekki verri en sú að með sigri eru þeir komnir í toppinn í riðlinum þannig að þá eru allt í einu allir orðnir hetjur aftur.“

Fyndinn bransi

Sjálfur finnur Arnar Gunnlaugsson vissulega fyrir pressu sem landsliðsþjálfari en á hans ferli hefur liðið unnið þrjá leiki af síðustu sautján.

„Þetta er svo fyndinn bransi eitthvað. Það hefðu getað verið svona fjögur, fimm mismunandi úrslit í Laugardalnum. Við hefðum getað unnið leikinn 3-0. Þeir hefðu getað unnið 2-1. Þetta hefði getað endað 3-3. En við þurfum bara að halda fókus og ekki fórna langtímamarkmiðum fyrir skammtímamarkmið. Þú ert bara einhvern veginn stanslaust að læra í þessu djobbi. Stundum velur þú bestu fótboltamennina, stundum er það ekkert besta liðið og væs versa. Stundum þarft þú betra balans í þessa stöðu og í þetta kerfi, þannig að þetta er bara stanslaus lærdómur. Leikurinn á móti Eistum var ekki það slakur eins og allir tala um. Við vorum með bakverðina mjög hátt uppi í uppspili í markinu okkar og það var frábært mark. En það hefur enginn áhuga á að tala um það, tala um einhverja fallega hluti þegar úrslitin falla ekki með okkur, þá vilja allir vera með hnífana úti og það er bara í fínu lagi.“

Leikur Lúxemborgar og Íslands er í kvöld klukkan 18:45. Bein útsending á Sýn Sport hefst klukkan 18.

Landslið karla í fótbolta Þjóðadeild karla í fótbolta