Tvær landsliðskonur urðu eftir heima vegna höfuðhögga

Handbolti.is greindi fyrst frá en Katrín Tinna og Hafdís þurftu báðar að hætta keppni í 28-27 sigri Íslands gegn Svartfjallalandi í gærkvöldi vegna höfuðhögga.

Handbolti.is segir að Ethel Gyða Bjarnasen, markvörður Fram, hafi verið kölluð út í hasti í gærkvöldi og ferðast með liðinu til Svartfjallalands. Engin verði kölluð inn í hópinn aukalega í stað Katrínar Tinnu heldur muni landsliðsþjálfarinn nýta krafta Alexöndru Lífar Arnarsdóttur, sem var kölluð inn í hópinn fyrr í vikunni.

Díana Dögg Magnúsdóttir mun líka koma til móts við hópinn í Svartfjallalandi en hún missi af fyrri leiknum vegna lokaprófs.

Mikil meiðsli hafa herjað á liðið að undanförnu. Thea Imani Sturludóttir og Alfa Brá Hagalín duttu út í vikunni vegna meiðsla, auk þess sem Þórey Anna Ásgeirsdóttir er komin í barneignaleyfi.

Engu að síður vann Ísland frækinn sigur gegn Svartfjallalandi í gærkvöldi og kom sér í vænlegri stöðu í undankeppni EM.