Danir kok­hraustir: „Fílingurinn sá að þennan leik eigi þeir að vinna“

Þorvaldur segir mikla stemningu ríkjandi meðal dönsku þjóðarinnar fyrir undanúrslitaleiknum gegn Íslandi á EM á morgun en leikur liðanna fer fram í Herning í Danmörku.

„Það er rosa stemning, svakaleg stemning. Það var byrjað strax að tala um þennan leik í vinnunni hjá mér í morgun. Það eru 75 prósent líkur á því að Íslendingar verði Evrópumeistarar. Þrjú af þessum fjórum liðum eru með íslenska þjálfara,“ sagði Þorvaldur í viðtali í Bítinu á Bylgjunni kíminn. 

Þegar kemur að leik Íslands og Danmerkur á morgun er hann ekki í nokkrum vafa um það hvort liðið hann styðji.

„Ég er hundrað prósent íslenskur í þessu öllu. Það er enginn í vafa um það. Maður er rótgróinn Íslendingur, þó ég sé alveg rótgróinn Dani núna líka þá liggja ræturnar alltaf til Íslands. Ég er aldrei í vafa þegar Danir eru annars vegar, þá held ég alltaf með Íslendingum.“

Hann hefur notið þess að fylgjast með íslenska landsliðinu á yfirstandandi Evrópumóti og segir það eiga möguleika á móti hinu ógnarsterka liði Danmerkur sem er ríkjandi heims- og ólympíumeistari.

„Mér lýst frábærlega á þetta lið. Þetta lið er sennilega eitt af þeim liðum sem hefur möguleika á móti Danmörku ef einhver hefur það. Danska liðið er náttúrulega frábært en við erum með þessa fljótu stráka sem geta rúllað sér í gegnum vörnina. Þeir eiga erfiðara með það Danirnir heldur en þessi klassísku lið þar sem að menn eru að stökkva upp fyrir utan og allt þetta.“

Hjartað segir honum að Ísland vinni en það gæti reynst erfitt hjá Íslendingum að finna leiðir fram hjá besta markmanni í heimi, Emil Nielsen og að stöðva besta handboltamann í heimi, Mathias Gidsel.

Íslenska landsliðið komið í undanúrslit á EM og þrjú af þeim fjórum liðum sem taka þátt í undanúrslitunum spila undir stjórn Íslendinga. 

Auk Íslands, sem þjálfað er af Snorra Steini Guðjónssyni eru Þýskaland sem spilar undir stjórn Alfreðs Gíslasonar og Króatía sem spilar undir stjórn Dags Sigurðssonar. Þorvaldur segir eftir þessum árangri tekið í Danmörku.

„Það er tekið eftir því og almennt séð tekið eftir því hversu ótrúlegt lið Ísland sé með. Fílingurinn í Dönum er sá að þennan leik eigi þeir bara að vinna, almenni Daninn segir það.“