Kastaði stól í Eyjum og fékk þriggja leikja bann

ÍBV 2 vann leikinn, 36-35, eftir vægast sagt dramatíska lokamínútu og voru Harðverjar afar óánægðir með dómgæsluna.

Þeir voru sérstaklega ósáttir með atburðarásina þegar Hörður var yfir, 35-34, gat náð tveggja marka forskoti og þjálfari liðsins, Pedro Nunes, ætlaði að taka leikhlé. Hann setti leikhlésspjaldið á ritaraborðið en leikurinn var ekki stöðvaður strax og var boltinn svo dæmdur af Herði vegna sóknarbrots, eins og sjá má hér að ofan.

Nunes mótmælti harðlega og fékk rautt spjald, og hefur nú verið úrskurðaður í eins leiks bann vegna sinnar hegðunar.

Einn af skráðum leikmönnum Harðar á leikskýrslu, Bragi Rúnar Axelsson, hefur hins vegar verið úrskurðaður í lengra bann. Hann fékk þriggja leikja bann vegna „ódrengilegrar“ hegðunar í leikslok, samkvæmt úrskurði aganefndarinnar.

Þar kemur jafnframt fram að Bragi Rúnar, sem reyndar hefur verið forsvarsmaður Harðar og var ekki í búningi á bekknum, hafi snöggreiðst og kastað stól í átt að leikmönnum ÍBV 2. Samkvæmt greinargerð Harðar var það vegna þess sem á gekk innan vallar en aganefnd taldi að framkvæmd leiksins og önnur atvik breyttu engu um að hegðun hans hefði verið ódrengileg og kallaði á þriggja leikja bann.

Stólakastið má sjá þegar tæpar tíu sekúndur eru eftir af myndbandinu hér að neðan.

ÍBV 2 tekur á móti KA í byrjun október, í 16-liða úrslitum Powerade-bikarsins, en dregið var í gær.

Annar í þriggja leikja bann fyrir gróft högg

Annar handboltamaður var einnig úrskurðaður í þriggja leikja bann í gær. Það var Ásgeir Snær Vignisson leikmaður Víkings, vegna grófs leikbrots í leik gegn Fjölni í Grill 66 deildinni í síðustu viku.

Aganefndin gat stuðst við myndbandsupptökur af leikbrotinu til að komast að sinni niðurstöðu, og má sjá brotið hér að neðan.