Ekki fleiri greinst með mis­linga í Banda­ríkjunum í 33 ár

Fjallað er um málið á vef BBC og vísað í umfjöllun Johns Hopkins háskóla en þar segir að mislingar hafi greinst í 38 ríkjum á þessu ári og að minnsta kosti þrír hafi láti lífið og 155 verið lagðir inn á spítala. Um 92 prósent þeirra sem hafa greinst eru óbólusett eða ekki vitað hvort séu bólusett samkvæmt Sóttvarnastofnun Bandaríkjanna.

Staðan er verst í Texas þar sem um 700 tilfelli hafa verið skráð. Þá segir í fréttinni að staðan sé einnig slæm í Kansas og Mexíkó. Heilbrigðisstarfsmenn segja stöðuna versta í hverfum þar sem bólusetningarhlutfall er lágt, til dæmis meðal mennoníta sem kjósa að nota ekki nútímalæknavísindi. Þá segir að það hafi einnig áhrif að þeim hefur fjölgað sem eru á móti bólusetningum.

Robert F Kennedy Jr, heilbrigðisráðherra Bandaríkjanna, hefur til dæmis dreift falsfréttum um barnabólusetningar og hefur gert lítið úr faraldrinum. Hann síðar lýsti því yfir að hann styðji MMR bólusetningu við mislingum, hettusótt og rauðum hundum og að það væri skilvirkasta leiðin til að koma í veg fyrir dreifingu mislinga.

Útrýmdu sjúkdómnum 2000

Mislingafaraldur náði hámarki sínu árið 1990 í Bandaríkjunum þegar greind voru 28 þúsund tilfelli. Um tíu árum síðar var því svo lýst yfir að búið væri að útrýma sjúkdómnum þegar tilfellin urðu færri en 90. Eftir 2014 byrjaði þeim svo aftur að fjölga og svo aftur árið 2019 þegar þau voru orðin 1.274. í ár eru þau orðin 1.277. Heilbrigðisstarfsmenn segja að ef ekkert verði gert verði ekki lengur hægt að segja að búið sé að útrýma sjúkdómnum í Bandaríkjunum.

Þá segir í fréttinni að vegna faraldursins hafi bólusetningum fjölgað og að sem dæmi hafi um 173 þúsund verið bólusettir í upphafi árs. Bólusetning er besta vörnin gegn smitsjúkdómum. Bólusetningar virka með því að kenna ónæmiskerfinu hvernig á að berjast gegn sjúkdómi ef það kemst í snertingu við hann. Þetta dregur mjög úr hættu á að veikjast alvarlega eða dreifa sjúkdómi til annarra.

Fjallað hefur verið um mislingafaraldur í fleiri löndum síðustu mánuði. Í Bretlandi höfðu í fyrra ekki jafn margir greinst með mislinga síðan 2012. Þá hefur tilfellunum einnig fjölgað í Kanada en á þessu ári hafa verið tilkynnt um þrjú þúsund tilfelli.

Sóttvarnalæknir fór í átak á Íslandi í fyrra í kjölfar þess að hér greindust einstaklingur með mislinga. Í febrúar 2024 kom upp eitt tilfelli mislinga á höfuðborgarsvæðinu og var gripið til bólusetningar til að draga úr líkum á útbreiðslu hjá þeim sem voru útsettir fyrir hinum smitaða.

Annað mislingatilfelli greindist svo í apríl á landsbyggðinni og var gripið til sömu ráðstafana. Engin tilfelli til viðbótar komu fram í kjölfarið á þessum tveimur tilfellum samkvæmt skýrslu sóttvarnalæknis sem kom út í mánuðinum.

Á vef landlæknis segir um mislinga:

„Mislingar (e. measles) er veirusjúkdómur sem er mjög smitandi og einkennist af hita og útbrotum um allan líkamann. Sjúkdómurinn getur verið hættulegur sumum einstaklingum en besta forvörnin er bólusetning. Mislingaveiran er mjög smitandi og berst milli manna með úða frá öndunarfærum (t.d. hósta og hnerra). Veiran getur lifað og valdið smiti í allt að tvær klukkustundir eftir að hún berst út í andrúmsloftið.“