Fjór­tán ára á rúntinum

Í dagbók lögreglu segir að barnið hafi verið flutt á lögreglustöð. Ekki hafi náðst í foreldra þess og Barnavernd því tekið við barninu. 

Málið er meðal margra sem lögreglan á höfuðborgarsvæðinu sinnti í nótt en 99 mál voru skráð frá klukkan fimm í gær til klukkan fimm í morgun. 

Axlarbein stóð út eftir rafskútuslys

Í tvígang var tilkynnt um einstaklinga sem höfðu fallið af rafskútu í Reykjavík. Í báðum tilvikum var sjúkralið kallað til. Í því seinna hafði kona fallið í jörðina með þeim afleiðingum að axlarbein hennar stóð út. Lögreglumenn lögreglustöðvar 3, sem sinna verkefnum í Breiðholti og Kópavogi, aðstoðuðu einnig einstakling sem hafði fallið af reiðhjóli og slasast. 

Tilkynnt var um slagsmál milli þrigga einstaklinga í miðborginni. Einn var fluttur á bráðamóttöku til frekari aðhlynningar. Þá var lögreglu tilkynnt um líkamsárás í miðborginni en gerandi fannst ekki. 

Ferðamaður kom á lögreglustöð og tilkynnti vasaþjófnað í miðborginni en við rannsókn kom í ljós að atvikið náðist á öryggismyndavélar.

Í miðborginni var einnig tilkynnt um mann sem hafði kastað glasi í bíl. Lögregla fór á vettvang og ræddi við viðkomandi en smávægilegar skemmdir urðu á bifreiðinni.

Lögreglustöð 2, sem sinnir verkefnum í Garðabæ og Hafnarfirði, var tilkynnt um eld í fellihýsi. Eiganda tókst að slökkva eldinn sjálfur áður en slökkvilið kom á vettvang. Lögreglustöð 3, í Kópavogi og Breiðholti, var tilkynnt um eld í tveimur bílum. Lögregla fór á vettvang ásamt slökkviliði.