Rafmennt í sam­starf og kaupir eignir þrota­búsins

Í tölvupósti sem barst kennurum við Kvikmyndaskólann í dag er greint frá viðræðunum. Þá er starfsfólki og nemendum boðið á kynningarfund á þriðjudaginn í húsakynnum Rafmenntar þar sem farið verður yfir framhaldið.

Alvarleg staða Kvikmyndaskólans hefur verið áberandi í umræðunni undanfarna daga. Rekstrarfélag skólans er farið í gjaldþrotameðferð og kennarar hafa unnið launalaust til að tryggja að nemendur útskrifist í vor. 

Mennta- og barnamálaráðuneytið hefur leitað eftir því að nemendur í Kvikmyndaskóla Íslands fái að ljúka námi sínu frá Tækniskólanum, lausn sem stjórnendur, starfsfólk og nemendur skólans voru óánægð með. 

Sjá einnig:  „Ég er bara ör­væntingar­full“

Óvíst með framhaldið

Þór Pálsson skólastjóri Rafmenntar segir samstarfið fyrst og fremst snúast um nemendur. Guðmundur Ingi Kristinsson, mennta- og barnamálaráðherra sagði á dögunum að Rafmennt hefði hætt við áform sín um að ganga í samstarf við Kvikmyndaskólann. Í yfirlýsingu sem Rafmennt sendi frá sér í kjölfarið sagði að svo væri ekki. 

„Við teljum okkur skyldug til að bjarga nemendum og náminu sem þeir eru í. En ekki fara að stoppa það og láta þá skipta um nám eða fara að gera eitthvað annað. Eins og mér fannst tilboðið vera frá Tækniskólanum miðað við þær fréttir sem við fengum frá nemendum. Þannig að við ætlum allavega að klára önnina,“ segir Þór í samtali við fréttastofu. 

En hvað svo?

„Það verður tíminn að leiða í ljós. Við óskum enn eftir samtali og samstarfi við menntamálayfirvöld. Það eru þessi fyrstu skref sem við tökum og svo verðum við að skoða, þegar önnin er búin, hvað svo.“

Þór segist að auki í góðu samtali við Háskólann á Bifröst, þar sem einnig er boðið upp á nám í kvikmyndagerð. Háskólinn sé tilbúinn að skoða hvernig útskriftarnemar Kvikmyndaskólans geti nýtt sér það við háskólann. Hann myndi þó fagna samtali við hvaða háskóla sem er. 

„Við erum bjartsýn um áframhaldandi nám í kvikmyndagerð á Íslandi. Við höfum áhuga á að það sé lifandi og byggja á því metnaðarfulla starfi sem hefur verið í Kvikmyndaskólanum hingað til.“

Miklar vendingar á skömmum tíma

Hlín Jóhannesdóttir rektor Kvikmyndaskóla Íslands segir vendingar hafa gengið með miklum hraða á mjög stuttum tíma. Hún gerir sér miklar vonir um að með breytingunum sé hægt að halda náminu áfram og jafnvel bæta um betur í framhaldinu. 

Þá tekur hún í sama streng og Þór og segir starfsfólk fyrst og fremst vera að hugsa um nemendurna svo þeir fái að ljúka vorönninni hið minnsta. 

„Þetta er nám sem við þurfum að hafa og halda á Íslandi og úr því sem komið er, er þetta það besta sem okkur bauðst og mér líst ágætlega á það,“ segir Hlín í samtali við fréttastofu. Þrátt fyrir óvissu um framtíð skólans kveðst hún bjartsýn.