Ernirnir flugu hátt í Super Bowl og rassskelltu meistarana

Ein versta frammistaða sögunnar

Þetta er í annað skiptið sem Eagles vinnur Ofurskálina en liðið vann hana einnig árið 2018. Sigur liðsins breyttist hreinlega í kennslustund eftir að liðið komst í 24-0 í fyrri hálfleiknum.

Patrick Mahomes og félagar í Chiefs áttu möguleika á því að vinna fyrstir allra þrjá Super Bowl leiki í röð en buðu í staðinn upp á eina verstu frammistöðuna í sögu Ofurskálarinnar. Þeir náðu að laga stöðuna aðeins með snertimörkum í blálokin og bjarga andlitinu en þó varla.

Chiefs liðið hefur ekki verið sannfærandi á leiktíðinni en náði engu að síður að landa hverjum sigrinum á fætur öðrum á seiglunni. Í nótt var hins vegar komið að skuldadögum og öll vandamálin blöstu við.

Þeir buðu upp á lélegustu frammistöðuna á tíma Mahomes með liðinu og þetta breyttist fljótt í martröð sem ætlaði engan enda að taka.

Það má þó ekki taka það frá leikmönnum Eagles að þeir áttu frábæran leik og hreinlega léku sér að mótherjum sínum á báðum endum vallarins.

Hurts maður leiksins

Jalen Hurts, leikstjórnandi Philadelphia Eagles, var kosinn mikilvægasti leikmaður leiksins, en hann skoraði sjálfur eitt snertimark og átti einnig tvær snertimarkssendingar. Hurts hljóp 72 jarda með boltann sem var það mesta í leiknum og hann stýrði leiknum með glans.

Fyrri hálfleikurinn var algjör martröð fyrir sóknarmenn Kansas City. Það gekk ekkert upp og þótt að vörnin hafi komist inn í sendingu og unnið boltann var það ekki nóg til að kveikja í sóknarmönnum liðsins.

Þurftu varla á Barkley að halda

Þannig tókst varnarmönnum Chiefs að halda hlauparanum Saquon Barkley í skefjum en það kom ekki í veg fyrir að Ernirir náðu góðri forystu. Ástæðan var að sóknarleikurinn hjá Chiefs var við frostmark.

Jalen Hurts skoraði fyrsta snertimark leiksins með hinu fræga „Tush Puss“ og vallarmark kom liðnu síðan í 10-0. Útlitið var fyrst slæmt fyrir alvöru þegar afmælisbarnið Cooper DeJean komst inn í sendingu Mahomes og skoraði í beinu framhaldi. DeJean varð sá fyrsti í sögu Super Bowl til að skora á afmælisdeginum sínum.

Eagles liðið var komið í 17-0 og fékk tækifæri til að bæta við. Chiefs náði að stoppa þá og fékk síðan mögulega lokasókn fyrri hálfleiks. Hún var ekki löng því Mahomes kastaði boltanum aftur frá sér.

Verstu þrjátíu mínúturnar á ferli Mahomes

Eagles fékk boltann á besta stað og það endaði með snertimarki hjá útherjanum A. J. Brown. Já, vont gat orðið enn verra. 24-0 undir og verstu þrjátíu mínúturnar á ferli Patrick Mahomes.

Eftir fyrri hálfleikinn var staðan er 13-1 í endurnýjunum og 179-23 í jördum. Patrick Mahomes hafði aðeins átt sex heppnaðar sendingar og var búinn að kasta boltanum tvisvar frá sér. Eagles vörnin var frábær og þeir voru með mikla yfirburði á bardagalínunni sem gerði Chiefs mjög erfitt fyrir.

Það breyttist lítið sem ekkert í hálfleik því fyrsta sókn Chiefs í seinni hálfleik var lítið betri en allar hinar vonlitlu sóknirnar. Jalen Hurts og félagar svöruðu á móti með fínni sókn sem tók margar mínútur af klukkunni og endaði með vallarmarki. 27 stigum yfir og nú var þetta orðin fjögurra sókna leikur. Öll líkamstjáning leikmanna Chiefs var eins og hjá liði sem er verið að leiða til slátrunar.

Staðan var 34-0

Þegar Eagles fékk boltann þá tóku þeir eina bombu og DeVonta Smith skoraði snertimark eftir sendingu frá Hurts. 34-0 er staða sem var erfitt að trúa en var engu að síður blákaldur veruleiki fyrir meistarana.

Nýliðinn Xavier Worthy skoraði snertimark fyrir Chiefs rétt fyrir lok þriðja leikhluta en það var bara alltof seint. 28 stiga munur fyrir lokaleikhlutann.

Jake Elliott skoraði tvö vallarmörk og Eagles var komið með 40 stig með 34 stiga forystu. Eftir það var minnsta vonarglætan endanlega slokknuð og allir farnir að biða eftir lokum leiksins.

DeAndre Hopkins skoraði snertimark og Chiefs lagaði aðeins stöðuna. Það var auðvitað alltof seint en munurinn fór alla vegna niður fyrir þrjátíu stigin.

Xavier Worthy átti góðan dag og skoraði sitt annað snertimark eftir 50 jarda bombu frá Mahomes. Tveggja stiga tilraunin heppnast líka og því endaði munurinn bara í átján stigum.