Gætið ykkar: Maðurinn sem vildi stýra Ís­landi með Snorra

Dagur tók við Króatíu fyrir tæpu ári síðan og kom liðinu á Ólympíuleikana í París í fyrra. Nú er gríðarleg pressa á honum að skila Króötum árangri á heimavelli á HM.

Staðan gæti verið allt önnur því þegar HSÍ var í þjálfaraleit, fyrstu mánuði ársins 2023, eftir brotthvarf Guðmundar Guðmundssonar þá ræddu forkólfar sambandsins við Dag varðandi möguleikann á að taka við landsliðinu. Eins og frægt varð þá lýsti Dagur þeim fundi sem hreinasta leikþætti.

Eins og Vísir greindi frá á sínum tíma þá voru Dagur og Snorri opnir fyrir því að taka við landsliðinu saman. Sá möguleiki virðist þó aldrei hafa verið ræddur af alvöru á þeim langa tíma sem að forráðamenn HSÍ unnu að ráðningu nýs þjálfara áður en Snorri var ráðinn 1. júní 2023. 

Núna mætast þeir Dagur og Snorri hins vegar á handboltavellinum í afar fróðlegri rimmu sem ræður miklu um framhaldið hjá báðum þjóðum á mótinu.

Króatar töpuðu eina leiknum þar sem reynt hefur á þá til þessa á HM, 28-24 gegn Egyptum, og þurfa nauðsynlega á sigri að halda gegn Íslandi í kvöld. Þó að Ísland hafi unnið flottan 35-30 sigur gegn Króötum á EM fyrir ári síðan, og þó að stærstu stjörnur Króata hafi helst úr lestinni, þá velkist enginn í vafa um hve þungt próf liggur fyrir strákunum okkar í Zagreb.

Stærstu stjörnurnar meiddust

Miðjumennirnir Luka Cindric og Domagoj Duvnjak áttu að leiða Króata til verðlauna á mótinu en hafa báðir átt við meiðsli að stríða. Ekki virðist þó alveg útilokað að hið minnsta annar þeirra spili í kvöld. Einhver orðrómur var um rifrildi á milli Dags og Cindric en Dagur þvertók fyrir það í viðtali við Vísi.

Ivan Martinovic er hættuleg, örvhent skytta úr Rhein-Neckar Löwen sem Íslendingar sluppu við að mæta á EM fyrir ári því hann hafði þá meiðst, og við hlið hans hafa hornamennirnir Filip Glavas og Mario Sostaric verið heitir. Þá hefur David Mandic, vinstri hornamaður toppliðs Melsungen í Þýskalandi, jafnað sig af meiðslum og ætti að styrkja króatíska liðið.

Jafnoki Viktors Gísla?

Sá sem ber þó kannski helst að vara við fyrir leikinn í kvöld er hinn 22 ára gamli markvörður Dominik Kuzmanovic. Þarna gæti mögulega verið kominn jafnoki Viktors Gísla Hallgrímssonar, í fyrsta sinn á mótinu, en þó ekki miðað við stórkostlega frammistöðu Viktors hingað til.

„Dominik Kuzmanovic er einn mest spennandi og hæfileikaríkasti markvörðurinn í evrópskum handbolta,“ sagði Guðjón Valur Sigurðsson eftir að hafa tekið á móti Kuzmanovic hjá þýska félaginu Gummersbach síðasta sumar.

Króatar þurfa enn frekar á Kuzmanovic að halda í ljósi þess að Matej Mandic getur ekki spilað, eftir árás liðsfélaga í félagsliði hans RK Zagreb.

Kuzmanovic er í fjórða sæti yfir flestar markvörslur í þýsku deildinni í vetur og hann vakti gríðarlega athygli á EM í fyrra með stórbrotnum leik í 30-24 sigri á Þjóðverjunum hans Alfreðs Gíslasonar. Þar varði Kuzmanovic 22 skot og var maður leiksins. Hann var einnig með 42% markvörslu í leik við Frakka sem enduðu á að vinna mótið. Kuzmanovic endurtók svo leikinn gegn Þjóðverjum í Ólympíuumspili í mars í fyrra og varði tæplega helming skota sem hann fékk á sig.

Það gæti því reynst þrautin þyngri fyrir íslenska liðið að finna fyrst leiðir í gegnum vörnina, sem Dagur hefur án efa fóðrað með fullt af gagnlegum upplýsingum, og svo framhjá Kuzmanovic.

Gangi það vel, og vinni Ísland sigur, enda strákarnir okkar efstir í milliriðli IV, sama hvernig fer gegn Argentínu á sunnudaginn.