Valsmenn unnu fyrstu bikartvennuna á öldinni

Það þarf í raun að fara alla leið aftur á síðustu öld til að finna síðustu bikartvennu í handboltanum. Fyrir 25 árum unnu Haukarnir bikarinn hjá körlum og konum en frá þeim tíma hafði engu félagið tekist það þar til að Valsmenn afrekuðu það um síðustu helgi.

Árið 1997 unnu Haukakonur 16-13 sigur á Val í úrslitaleiknum en karlarnir unnu 26-24 sigur á KA sem höfðu þá unnið bikarinn tvö ár þar á undan.

Í aðalhlutverki hjá Haukaliðunum þetta árið voru þá kærustuparið Aron Kristjánsson og Hulda Bjarnadóttir. Gústaf Bjarnason, bróðir Huldu lék líka með Haukunum. Hulda var markahæst hjá Haukakonum með fjögur eins og Judit Ezstergal en Aron skoraði þrjú mörk fyrir karlaliðið. Rúnar Sigtryggsson var markahæstur með sjö mörk og Gústaf skoraði fimm mörk.

„Það hefur aldrei komið svona dagur hjá félaginu áður og það er mjög sjaldgæft í handboltanum að bæði meistaraflokkslið félagsins verði bikarmeistarar. Þetta er frábær dagur og allir áhangendur félagsins eru í skýjunum, og ég held að margir hverjir, sérstaklega þessir eldri munu ekki ná sér niður í langan tíma,“ sagði Aron Kristjánsson í viðtali við Dag-Tímann en þar var rætt við kærustuparið.

Þetta var fyrsti bikar Arons en Hulda hafði unnið hann áður. „Ég var í Víkingsliðinu sem sigraði í þessari keppni, en þetta er allt öðruvísi tilfinning, enda er þetta annað árið sem ég spila með Haukum. Mér finnst ég eiga heima hérna, en það var ekki sama upp á teningnum þegar ég spilaði með Víkingi,“ sagði Hulda í viðtalinu við Tímann.

Aðeins þrisvar áður hafði félag unnið bikartvennuna en þar af eiga Valsmenn tvö af þeim árum.

Valur varð fyrsta félagið til að vinna tvennuna árið 1988 en árið eftir léku Stjarnan í Garðabæ það eftir. Árið 1993 unnu Valsmenn síðan bikartvennuna í annað skiptið.

Í Valsliðinu árið 1988 var Júlíus Jónasson í stóru hlutverki en sonur hans, Alexander Örn Júlíusson, tók einmitt við bikarnum fyrir hönd Valsmanna um síðustu helgi. Valsmenn unnu þá 25-15 sigur á Breiðabliki í bikarúrslitaleik karla en konurnar unnu áður 25-20 sigur á Stjörnunni í sínum úrslitaleik.

„Þetta er í einu orði sagt frábær stund hjá okkur Valsmönnum. Við náðum þeim áfanga í kvöld að verða fyrsta félagsliðið til að vinna þrjá titla á einu tímabili. Við stefndum ákveðið að þessum árangri í upphafi keppnistímabilsins og nú er þessi árangur í höfn. Ég vil þakka þennan árangur góðri liðsheild og frábærum þjálfara,“ sagði Geir Sveinsson, fyrirliði Valsmanna, í samtali við DV eftir leikinn.

Bikartvenna Stjörnunnar árið 1989 var líka söguleg fyrir Garðabæjarliðið því þetta var fyrsti titilinn af mörgum hjá kvennaliði félagsins. Karlaliðið hafði unnið sinn fyrsta titil tveimur árum fyrr.

Svo skemmtilega vildi til að fyrirliðar Stjörnunnar árið 1989 voru systkinin Skúli og Guðný Gunnsteinsbörn og tóku þau bæði við bikarnum á þessum fimmtudegi sem jafnframt var Sumardagurinn fyrsti.

„Þetta var þriðji bikarúrslitaleikur okkar á fjórum árum og kominn tími til að sigra. Við lögðum allt í þennan leik og unnum á góðri liðsheild,“ sagði Guðný Gunnsteinsdóttir, fyrirliði Stjörnunnar, við Morgunblaðið eftir leikinn.

Valsmenn hafa því unnið þrjár af fimm bikartvennum sögunnar og eina félagið sem hefur unnið hana oftar en einu sinni.