Ekki hægt að rekja neinar ferðir notenda Vivaldi vafrans

„Um leið og við siglum saman í gegnum erfiða tíma og milljónir manna um heim allan eru að vinna heima hjá sér, gegnir vafrinn lykilhlutverki,“ er haft eftir Jóni von Tetchner stofnanda og forstjóra Vivaldi vafrans í fréttatilkynningu frá Vivaldi í dag. Þar segir frá einni stærstu uppfærslu vafrans frá  upphafi en hún felur meðal annars í sér vernd fyrir notendur frá rekjurum (e.trackers). 

Höfuðstöðvar Vivaldi eru í Osló en fyrirtækið er einnig með starfsstöð á Eiðistorgi á Seltjarnarnesi og í Boston í Bandaríkjunum.

Vivaldi vafrinn hefur haft þá sérstöðu að rekja ekki ferðir notenda sinna um veraldarvefinn. Það sem uppfærsla vafrans í dag þýðir er að lokað verður á aðra rekjara líka, þ.e. nýja rekjaravörnin ver notendum fyrir því að aðrir geti rakið ferðir notenda og safnað um þá upplýsingar.

„Nú sem aldrei fyrr þarfnast mannkynið vafra sem er opinn og virkar vel en er líka öruggur og veitir notendum friðhelgi. Með nýja Vivaldi vafranum geta notendur vafrað og nýtt sér ótal eiginleika hans hratt og örugglega án þess að ferðir þeirra séu raktar á netinu,“ er jafnframt haft eftir Jóni í tilkynningu um uppfærslu vafrans.

Þar segir einnig að í dag gefi Vivaldi út nýja útgáfu fyrir Android síma sem sögð er stútfull af nýjum eiginleikum, s.s. innbyggðum auglýsingavörnum og rekjaravörnum. 

Innbyggða auglýsingavörn Vivaldi lokar á óviðeigandi og ágengar auglýsingar án þess að notendur vafrans þurfi til þess að hlaða niður sérstökum viðbótum. Markmiðið með þessu sé að auka á friðhelgi notenda.

Af öðrum nýjungum sem fylgja uppfærslunni í dag eru lyklaborðsflýtilyklar sem gera það að verkum að notendur þurfa mun minna á því að halda að nota músina til að ferðast um síðu.

Nánar má lesa um uppfærslu vafrans hér.