Óboðlegt að sitja undir í­þyngjandi regluverki en njóta ekki á­góðans

Greint var frá því í morgun að Evrópusambandið hafi frestað ákvörðun um verndarráðstafanir á íslenskan og norskan kísilmálm til morguns. Endanlega ákvörðun átti að taka síðastliðinn föstudag eftir að ákveðið var að Ísland og Noregur yrðu ekki undanþegin verndarráðstöfunum sambandsins.

Sviðsstjóri hjá Samtökum iðnaðarins vonar að frestun fundarins sé til marks um að ekki sé full eining innan Evrópusambandsins um ráðstafanirnar.

„Það lítur út fyrir það, þegar verið er að fresta svona stórri ákvörðun í tvígang að það þýði að það er einhver samstaða með Íslandi og Noregi og við vitum að Norðurlöndin hafa tekið undir okkar sjónarmið,“ segir Sigríður Mogensen, sviðsstjóri hjá Samtökum iðnaðarins. 

Þvert gegn anda EES-samningsins

Sigríður er sjálf á leið út til Brussel til að sækja fundi þingmanna- og ráðgjafanefndar EFTA seinna í vikunni. Hún telur verndarráðstafanirnar verða ofarlega á baugi.

„Þessi tillaga er þvert gegn anda EES samstarfsins og yrði mjög slæmt fordæmi til framtíðar.“

Taki verndarráðstafanirnar gildi verði íslensk stjórnvöld að íhuga framtíð EES-samningins.

„Og skoða með mjög gagnrýnum huga nýtt regluverk sem er að koma inn og horfa a það með gagnrýnum augum. Af því að það gengur ekki að bera kostnað af regluverkinu en hafa ekki aðgengi að mörkuðum,“ segir Sigríður. 

Óboðlegt að skerða aðgengi að mörkuðum

Evrópumarkaðurinn er mjög mikilvægur fyrirtækjum eins og Elkem á Grundartanga sem flytja út mikið magn kísilmálms. Draga þarf úr framleiðslu Elkem á næstu vikum, meðal annars vegna óvissu á mörkuðum.

„Íslensk fyrirtæki búa við regluverk sem á mörgum köflum getur verið mjög íþyngjandi og hækkar þeirra framleiðslukostnað. Meðal annars kröfur í umhverfismálum, loftslagsmálum, greiða gríðarlega mikið inn á Evrópumarkað í formi kolefnisskatta og fleira. Það er algjörlega óboðlegt ef niðurstaðan verður sú í þessu máli að þau hafi ekki fullan og greiðan aðgang að mörkuðum.“