Íbúasamráð – hvað er það?

Virðulegu borgarafulltrúar,

Þegar ég sat fyrst í samráðshópi um sameiningar skóla í norðanverðum Grafarvogi  2011/2012 var ég full áhuga og fannst spennandi að skólayfirvöld vildu fá aðkomu foreldra að skipulagi skólanna.  Vonbrigði mín voru mikil þá, þegar fyrirframákveðin sameiningarhugmynd var keyrð í gegn, þvert á tillögur foreldra.

Þegar aftur var farið af stað með samráðshóp á þessu ári, með aðkomu foreldra, um framtíð skólahalds í Staðahverfi, fann ég til með þeim foreldrum tóku þátt, vitandi það að þau væru vongóð um að hlustað yrði á raddir þeirra.   Því miður heyrði ég í fréttum í dag að tilfinning mín reyndist rétt, borgin keyrir bara áfram sínar hugmyndir án þess að hlusta á raddir íbúa.

Eða hvað þýðir samráð við íbúa?  Hlustað á raddir – kannski er það jú gert.  En þegar kemur að ákvörðun, þá bara skiptum við engu máli.  Ákvörðun er bara tekin einhliða.

Ég er svo drullusvekkt, trúði ekki að þetta yrði í alvöru að veruleika.  Að grunnskóla í einu hverfi sé lokað, þegar það er í lægð hvað barnafjölda varðar.  Talað er  um í skýrslum borgarinnar að hverfi komist í jafnvægi á 30-40 árum.  Við erum c.a. 20 ára gamalt hverfi.  Gefið okkur smá séns.  Ef þið eruð óþolinmóð getið þið bara þétt byggð hér eins og annars staðar.  Nóg er landrýmið.

Þið segið að einungis 59 börn séu í skólanum.  Þið vitið að það er af því þið hafið fært unglingana yfir í annan skóla nú þegar.  Þess vegna er þessi tala engan vegin rétt, og svo óheiðarlegt að nota hana í fréttaflutningi.

Þið hampið skólum t.d. á Kjalarnesi, þar er leikskóli rekinn samhliða grunnskóla.  Svo frábær hugmynd.  Af hverju leyfið þið þessari hugmynd ekki að blómstra einnig í Staðarhverfi?  Þegar leikskólinn Bakki opnaði hér í hverfinu, var tekið fram í skýrslum ykkar og fréttaflutningi, að húsnæðið væri bráðabirgða, gert væri ráð fyrir að hann myndi flytjast inn í skólahúsnæðið síðar.

Á morgun er ákvörðun tekið um framtíð heils hverfis.  Þið takið ákvörðun um framtíð barnanna okkar, án samráðs við okkur og börnin okkar.  Þið takið ákvörðun um verðmæti og endursöluverð á húsnæðum okkar.  Þið takið hjartað úr hverfinu okkar.  Spyrjið hvert okkar sem er, okkur íbúana, sem borgum okkar útsvar og biðjum ekki um mikið.  Við viljum þetta ekki.   Hér er ekki mikil þjónusta sem þarf að kosta til fyrir okkur.  Við viljum bara hafa skóla í hverfinu okkar.   Korpuskóli er góður skóli, margverðlaunaður fyrir góð verkefni.  Börnunum okkar líður vel hér.  Ég skil bara engan veginn hvernig þið getið með góðri samvisku greitt þessu atkvæði á morgun, þvert gegn vilja okkar.

Nú biðla ég til ykkar kæru borgarfulltrúar, að hætta við þessa ákvörðun um að loka Korpuskóla, og fara frekar að vinna með okkur íbúum og ekki á móti okkur.

Með vinsemd og virðingu

Höfundur er íbúi í Staðahverfi og foreldri í Korpuskóla.