Helena með 19 stig á aðeins 17 mínútum

Helena Sverrisdóttir var stigahæst hjá liði DVTK Miskolc þegar liðið vann 90-30 sigur á MKB Euroleasing Vasas í ungversku úrvalsdeildinni í körfubolta í kvöld.

Helena nýtti spilatímann sinn heldur betur vel í þessum leik. Helena skoraði 19 stig á aðeins 17 mínútum og skoraði sex stigum meira en sú næststigahæsta í liðinu.

Helena hitti meðal annars úr 6 af 7 þriggja stiga skotum sínum en auk stiganna var hún með 3 fráköst og 1 stoðsendingu.

DVTK Miskolc hefur unnið 7 af 10 deildarleikjum sínum á tímabilinu og er í 3. sæti deildarinnar. Liðið er úr leik í báðum Evrópukeppnum og einbeitir sér nú að baráttunni heima fyrir.