Skuldar engum neitt vegna Guðjohn­sen nafnsins

Daníel er leik­maður Svíþjóðar­meistara Mal­mö og hefur búið við eftir­væntingu í sinn garð sökum Guðjohn­sen nafnsins en segist sjálfur ekki skulda neinum neitt sökum þess nafns.

Ís­lendingurinn var í viðtali við sænska miðilinn Expres­sen á dögunum þar sem að hann ræddi meðal annars tíma sinn hjá Mal­mö til þessa sem segja má að hafi ekki verið nein göngu­ferð í garðinum. Meiðsli hafa hamlað fram­göngu Daníels Tristans í liðinu en hann gekk til liðs við Mal­mö frá akademíu Real Madrid árið 2022.

„Framtíðin var björt,“ segir Daníel í sam­tali við Expres­sen. „Ég sá aðeins bjarta tíma fram­ undan. Bjóst við því að fá meiri og meiri spiltíma en svo kom skellurinn.“

Bak­meiðsli plöguðu Daníel Tristan í fyrra. Álags­meiðsl komu svo í ljós í ágúst það sama ár. Meiðsli sem héldu honum meira og minna frá knatt­spyrnu­vellinum þar til í mars fyrr á þessu ári.

„Þetta hefur verið krefjandi ár. Ég hefði viljað spila meira en sam­keppnin er mikil hjá Mal­mö,“ segir Daníel sem vill ekki taka undir það að eitt ár af ferlinum hafi farið í vaskinn.

„Ég glataði jú einu ári af fót­bolta­iðkun en ég græddi ár í líkams­ræktar­salnum þar sem að ég byggði upp vöðva. Með því að verða sterkari verður það auðveldara fyrir mig að spila gegn þeim eldri,“ bætti hann við og segist ekki hafa stressað sig of mikið af þessum hrak­förum. Hann sé enn ungur að árum.

Guðjohn­sen nafnið er þekkt víða um heim eftir glæsta ferla Arnórs Guðjohn­sen, afa Daníels sem og föður hans Eiðs Smára Guðjohn­sen. Synir Eiðs Smára eru þrír og allir at­vinnu­menn í knatt­spyrnu. Því hefur fylgt eftir­vænting og að ein­hverju leiti dulin pressa varðandi það hvort strákarnir geti fetað í fót­spor pabba og afa síns en þeir láta það ekkert á sig fá.

„Ég skulda engum neitt vegna nafns míns. Faðir minn átti sinn feril og ég á minn. Bræður mínir eiga sína ferla. Ég ein­blíni bara á að verða betri með degi hverjum…„Maður verður vanur þessu. Þegar að maður er yngri gæti þetta haft áhrif á mann, en þá meira á jákvæðan hátt. Þú nýtur þess að fólk hefur trú á þér og maður telur sjálfur að maður muni ná langt og verða bestur.“

Daníel Tristan er ekki á því að halda frá Mal­mö í leit að meiri spiltíma. Að­spurður hvort hann hafi hug á því að fara á láni eitt­hvert annað er hann stutt­orður og skýr í sínu svari:

„Ég vil vera áfram hérna og keppa um sæti. Framtíðin er enn björt. Það býr mikið í mér og aðeins tíma­spursmál hvenær ég mun sýna það.“