Sherman: Peyton er líklega sá besti í sögunni

Richard Sherman, bakvörður Seattle Seahawks, segir að Peyton Manning, leikstjórnandi Denver Broncos, sé líklega einn besti leikstjórnandi sögunnar.

Liðin mætast í Super Bowl í kvöld en leikurinn fer fram á MetLife-leikvanginum í New Jersey.

„Þetta eru tvö bestu liðin í NFL-deildinni og líklega besti leikstjórnandi deildarinnar frá upphafi. Þetta verður mikil áskorun fyrir bæði lið sem gerir leikinn svo stóran,“ sagði Sherman.

Pete Carroll, þjálfari Seattle, segir að það verði algjör lykilatriði fyrir hans menn að setja pressu á Manning.

„Þegar hann er á sínum stað í vasanum - sem er langoftast - þá þarf maður að glíma við það allra besta sem hann hefur upp á að bjóða,“ sagði Manning.

„Hann hefur frábæran skilning á vasanum og getur hreyft sig mjög vel í honum. En til að ná okkar fram verðum við að fá hann til að hreyfa sig eins mikið og mögulegt er.“

Carroll og John Fox ræddu við fjölmiðlamenn á blaðamannafundi í New Jersey á dögunum og má sjá ummæli þeirra hér fyrir ofan.

Fox, sem er þjálfari Denver, ræddi um æfingar sinna manna og að þeir væru tilbúnir fyrir hvaða veður sem er annað kvöld.

Super Bowl XLVIII milli Denver Broncos og Seattle Seahawks fer fram á Metlife Stadium í New Jersey verður í beinni útsendingu á Stöð 2 Sport HD í kvöld. Upphitun hefst klukkan 22.00 en leikurinn sjálfur klukkan 23.25. Andri Ólafsson stýrir umræðum á meðan leiknum stendur og áhorfendur eru hvattir til að taka þátt á Twitter með merkinu ‪#‎NFLisland‬.