„Held ég muni pakka henni saman“

Hin magnaða Hekla María Friðriksdóttir mun þá stíga í búrið og berjast við hina finnsku, Kertu Saarnisari.

„Mér finnst ógeðslega gaman að berjast hérna heima fyrir framan fólkið mitt,“ segir Hekla María spennt fyrir kvöldinu.

Eins og áður segir er andstæðingur hennar frá Finnlandi og Hekla ætlar sér ekkert annað en sigur.

„Hún er ríkjandi Norðurlandameistari og tók silfur á Evrópumeistaramótinu. Hún er með mikla bardagareynslu og flottur andstæðingur. Ég held samt að ég munu pakka henni saman,“ segir okkar kona kokhraust og það ekki að ástæðulausu.

Það er nefnilega stutt síðan hún mætti Evrópumeistaranum og fór létt með hann.

„Ég vann Evrópumeistarann í fyrstu lotu í ágúst. Það var mjög skemmtilegt og ég var mjög stolt af mér. Varðandi andstæðinginn núna þá er ég betri í glímu en hún. Mín glíma er mjög góð og góð pressa ofan á frá mér. Síðustu mánuði hef ég bætt mig rosalega standandi og að ná fólki niður. Ég er á uppleið og þar að leiðandi með mikið sjálfstraust.“

Hekla María er með fimm bardaga undir beltinu og hún hefur klárað þrjá þeirra í fyrstu lotu.

„Ég hef unnið alla mína bardaga á uppgjafartaki og ég sé alveg fyrir mér að halda áfram á þeirri braut. Eina tapið mitt var í bardaga sem fór alla leið,“ segir Hekla María sem er orðin 31 árs og langar að fara lengra með ferilinn.

„Mig langar að verða atvinnumaður. Ég sé alveg fyrir mér að gera það fljótlega. Þar sem ég er orðin 31 árs finnst mér ég verða að drífa mig. Mig dreymir stóru draumanna.“