Ís­lendingarnir ljúka keppni í ein­stak­lings­keppni á EM

Símon Elías Statkevicius reið á vaðið fyrir íslenska hópinn í morgun þegar hann synti 50 metra skriðsund á 22,81 sekúndu. Það er næstbesti tími hans í greininni og aðeins 0,14 sekúndum frá hans besta árangri. Símon hafnaði í 57. sæti af 77 keppendum.

Guðmundur Leo Rafnsson synti 100 metra baksund á 56,13 sekúndum og varð í 51. sæti af 66 keppendum. Tíminn er einnig næstbesti tími Guðmundar í greininni og aðeins 0,16 sekúndum frá hans besta.

„Ég ætlaði að fara undir 56, en þetta er næstbesti tíminn minn svo það er ekkert slæmt,“ segir Guðmundur eftir sundið í samtali við Sundsamband Íslands.

Birgitta Ingólfsdóttir keppti í 50 metra bringusundi og synti á 32,74 sekúndum. Hún hafnaði í 38. sæti af 41 keppanda.

Birnir Freyr Hálfdánarson lauk svo einstaklingskeppni Íslendinganna með 200 metra fjórsundi. Hann synti á 2:05,18 og varð í 44. sæti af 48 keppendum.

Íslensku keppendurnir eiga þó eina grein eftir á mótinu. Á morgun, lokadegi EM, keppir karlasveit Íslands í 4x100 metra fjórsundi.

„Við erum með ótrúlega sterka sveit. Þetta verður bara mjög gaman,“ segir Guðmundur um boðsundið.