Reynir marka­hæstur í Íslendingaslagnum

Reynir skoraði sjö mörk úr tíu skotum og leiddi þýska liðið Melsungen til sigurs.

Línumaðurinn Arnar Freyr Arnarsson komst ekki á blað en tók eitt skot fyrir Melsungen.

Einar Bragi Aðalsteinsson átti góðan leik fyrir Kristianstad og skoraði fimm mörk.

Staðan var jöfn þegar rúmar fimm mínútur voru eftir og allt stefndi í spennandi lokamínútur, en Kristianstad skoraði aðeins eitt mark gegn fimm mörkum Melsungen og þurfti að sætta sig við tap.

Melsungen er í mjög góðri stöðu í milliriðlinum, liðið tók fullt hús stiga með sér úr riðlakeppninni og vann þennan leik í fyrstu umferð milliriðlanna í kvöld.

Annar Íslendingaslagur var á dagskránni í kvöld, þegar Skanderborg sótti 28-33 sigur gegn Porto, en þar tóku Íslendingarnir lítinn þátt.

Þorsteinn Leó Gunnarsson er leikmaður Porto en hefur verið að glíma við meiðsli og kom bara inn á til að taka eitt skot í þessum leik. Kristján Örn Kristjánsson er leikmaður Skanderborg en gekkst nýlega undir aðgerð eftir kviðslit og tók ekki þátt í kvöld.