Sport

Fatlaðir fá að keppa fyrir hönd Rúss­lands

Ágúst Orri Arnarson skrifar
Rússneski fáninn hefur ekki sést á Vetrarólympíumóti fatlaðra síðan 2014 en honum verður flaggað í Mílanó og Cortina. 
Rússneski fáninn hefur ekki sést á Vetrarólympíumóti fatlaðra síðan 2014 en honum verður flaggað í Mílanó og Cortina.  Ezra Shaw/Getty Images

Á yfirstandandi Vetrarólympíuleikum þarf rússneskt íþróttafólk að keppa undir hlutlausum merkjum en aðrar reglur verða í gildi á Vetrarólympíumóti fatlaðra.

Sex rússneskir og fjóra hvítrússneskir íþróttamenn munu keppa fyrir hönd sinnar þjóðar á Vetrarólympíumóti fatlaðra í Mílanó og Cortina í næsta mánuði.

Alþjóða íþróttasamband fatlaðra staðfesti tíðindin í dag en þetta verður í fyrsta sinn sem rússneskum fána verður flaggað á stórum alþjóðlegum íþróttaviðburði síðan Rússland réðst inn í Úkraínu árið 2022.

Reyndar verður þetta í fyrsta sinn síðan 2014 sem rússneski fáninn mun blakta við hún á Vetrarólympíumóti fatlaðra. Rússar voru á sínum tíma bannaðir fyrir ólöglega lyfjanotkun.

Meðal þeirra sem munu keppa fyrir hönd Rússlands á Vetrarólympíumótinu verða Aleksey Bugaev, þrefaldur gullverðlaunahafi í alpagreinum, og gönguskíðafólkið Ivan Gollubkov og Anastasiia Bagiian.

Þau þrjú tóku öll þátt á heimsbikarmótum í janúar og unnu gullverðlaun. Rússarnir þykja því líklegir til afreka.

Vetrarólympíumót fatlaðra fer fram í Mílanó og Cortina á Ítalíu þann 6. - 15. mars næstkomandi.




Fleiri fréttir

Sjá meira


×