Sport

Bæði lið í treyju Patta í kvöld

Sindri Sverrisson skrifar
Patrekur Freyr Sveinsson lést í bílslysi, aðeins 17 ára gamall.
Patrekur Freyr Sveinsson lést í bílslysi, aðeins 17 ára gamall. @srishokki

Til stendur að fylla Skautahöllina í Laugardal í kvöld þegar leikið verður til minningar um Patrek Frey Sveinsson, íshokkístrákinn sem lést í bílslysi í síðustu viku.

Leikurinn er á milli SR og Fjölnis en Patti, eins og hann var kallaður, hafði spilað fyrir bæði þessi félög. Leikmenn liðanna munu heiðra minningu hans sérstaklega með því að klæðast upphitunartreyjum með nafni Patreks og númerinu hans, 12.

Allur ágóði af miða- og veitingasölu mun renna óskiptur til fjölskyldu Patta, og þá verður glæsilegur kökubasar á leiknum þar sem einnig verður safnað fyrir fjölskylduna.

Leikurinn hefst klukkan 19:45 en áður verður minningarathöfn, mínútu þögn og viðhafnarpökkakast. Bjarni töframaður verður kynnir og spilar tónlist í anda Patreks sem félagar hans úr U18-liði SR völdu.

Söngvarinn Hreimur Örn Heimisson syngur í fyrra leikhléi, undir myndasýningu af Patta. Í seinna leikhléi verður svokallað pökkakast þar sem áhorfendur geta unnið glæsilega vinninga. Einn pökkur kostar 1.500 krónur og þrír kosta 3.000 krónur, að sjálfsögðu til styrktar fjölskyldu Patreks.

Þá er bent á styrktarreikning fyrir frjáls framlög: 0511-14-077086, kt. 150886-3419.




Fleiri fréttir

Sjá meira


×