„Þá byrja þeir bara að spila þennan við­bjóð“

„Við gerðum bara ekki nóg í dag og þurfum að borga fyrir það með tapi.“

Íslenska liðið byrjaði leikinn illa og klikkaði á mikið af dauðafærum, sem varð til þess að strákarnir voru að elta Króata allan leikinn. 

„Ég veit ekki hvort það sé hægt að tala um andlegan styrk eða hvað vantar. Við bara skorum ekki í byrjun og á móti svona liði þá máttu bara ekkert missa þá fram úr þér. Þá bara byrja þeir að spila þennan viðbjóð sem þeir gera. Labba upp og hægja á leiknum. Við lærum greinilega ekki okkar lexíu með það. Við erum búnir að spila þrisvar við þá og þetta  hefur alltaf verið eins.“

Þá segir Bjarki að þetta tap hafi verið extra súrt, hafandi verið lengi í landsliðinu og aldrei jafn nálægt því að vinna til verðlauna.

„Já, það bara segir sig sjálft. Ég sá fyrir mér að ná í medalíu í dag, en það varð ekki.“

En hvað þarf liðið að gera til að taka næsta skref að mati Bjarka?

„Við þurfum bara að halda áfram á þessari vegferð. Við erum búnir að taka skref síðustu tvö ár myndi ég segja. Síðasta mót var náttúrulega eins og það var með þarna milliriðladæmið og núna förum við í undanúrslit. Kannski þurfum við bara að fara lengstu leið í heimi að þessari medalíu, en á meðan við erum á þessum mótum þá höldum við bara áfram að trúa og gefum allt sem við eigum,“ sagði Bjarki að lokum