Hver er staðan og hvað tekur við?

Strákarnir okkar byrja ballið í Malmö í dag klukkan 14:30 og eru sem betur fer í þeirri stöðu núna að þurfa ekki að treysta á neina nema sjálfa sig, eftir að Svíþjóð mistókst að vinna Ungverjaland.

Tap í dag þýðir hins vegar 7.-8. sæti á mótinu eða í besta falli, með mikilli hjálp, leikur um 5. sæti sem gefur sæti á næsta HM.

Hvað ef Ísland vinnur í dag?

Þá endar liðið með sjö stig og kemst í undanúrslit. Ísland endar þá í 2. sæti milliriðilsins, eða í 1. sæti ef Króatía vinnur ekki Ungverjaland síðar í dag.

Hvað ef Ísland gerir jafntefli í dag?

Þá endar Ísland með sex stig og þarf að treysta á að Svíþjóð vinni ekki Sviss í kvöld. Sigur Svía myndi hins vegar þýða 3. sæti fyrir Ísland í milliriðlinum og leikur um 5. sæti á mótinu.

Hvað ef Ísland tapar í dag?

Þá kemst Slóvenía upp fyrir Ísland sem endar í 4. sæti milliriðilsins, og í 7.-8. sæti alls í mótinu, eða í besta falli í 3. sæti milliriðilsins ef Svíþjóð tapar fyrir Sviss.

Leikirnir í dag:

Milliriðill II

• 14.30 Slóvenía – Ísland
• 17.00 Króatía – Ungverjaland
• 19.30 Sviss – Svíþjóð

Milliriðill I

• 14.30 Spánn – Portúgal
• 17.00 Þýskaland – Frakkland
• 19.30 Danmörk – Noregur

Geta Danir valið sér andstæðing?

Það eina sem er alveg á hreinu fyrir leiki dagsins er að Danmörk á öruggt sæti í undanúrslitunum. Lærisveinar Alfreðs Gíslasonar í Þýskalandi spila úrslitaleik við Frakka um að fylgja Dönum upp úr milliriðli I, og dugar þar jafntefli.

Danir spila í kvöld og vita að ef að Frakkland vinnur Þýskaland þá endar Danmörk í efsta sæti síns milliriðils, og mætir þá liðinu í 2. sæti milliriðils II. 

Ef að hins vegar Þjóðverjar forðast tap gegn Frökkum þá gætu Danir enn endað í 2. sæti milliriðilsins og spilað við liðið sem vinnur milliriðil Íslands. Raunar gætu Danir þá verið í þeirri stöðu að geta „ráðið“ hvaða liði þeir mæta í undanúrslitum, að því marki sem þeir ráða úrslitunum í leik sínum við Noreg.

Króatar í bestu stöðunni

Í milliriðli II eru Króatarnir hans Dags Sigurðssonar í bestu stöðunni en álagið hefur verið mikið og ef þeir vinna ekki Ungverja í dag eiga þeir á hættu að missa Ísland og Svíþjóð upp fyrir sig. 

Króatar munu þó vita fyrir sinn leik hvernig fór hjá Slóveníu og Íslandi, og væru nær öruggir í undanúrslit með sigri Slóvena (aðeins jafntefli Svíþjóðar og Sviss myndi breyta því en þá yrði Króatía fyrir neðan Svíþjóð og Slóveníu vegna innbyrðis úrslita).

Mikið í húfi fyrir Slóvena og Svíar vilja íslenskt tap

Slóvenía þarf að vinna Ísland og treysta á að Svíþjóð tapi fyrir Sviss, til að komast í undanúrslit, en getur með sigri á Íslandi að minnsta kosti tryggt sér leik um 5. sæti á mótinu sem eins og fyrr segir gefur öruggt sæti á næsta heimsmeistaramóti. Það er því að nægu að keppa fyrir Slóvena í dag.

Svíar þurfa að treysta á að annað hvort Íslandi eða Króatíu mistakist að vinna í dag og þá geta þeir komið sér í undanúrslit með sigri gegn Sviss í kvöld.

Undanúrslit á föstudag

Undanúrslitin á EM, og leikurinn um 5. sætið, fara fram í Herning í Danmörku á föstudaginn. Leikurinn um 5. sæti er klukkan 14 og undanúrslitaleikirnir svo klukkan 16:45 og 19:30. Á sunnudag er svo bronsleikurinn klukkan 14:15 og úrslitaleikurinn klukkan 17.