„Það sem hefur orðið okkur að falli á síðustu mótum“

Ísland spilaði tvo æfingaleiki um helgina. Öruggur sex marka sigur vannst gegn Slóveníu á föstudag. Tveggja marka tap varð svo niðurstaðan í hörkuspennandi leik gegn Frakklandi á sunnudag.

„Mér fannst báðir leikir, á margan hátt, mjög jákvæðir“ segir Einar Jónsson, þjálfari Fram og álitsgjafi landsliðsins.

„Fyrri hálfleikir í báðum leikjum voru mjög góðir, svo auðvitað eins og alltaf í æfingaleikjum var verið að rótera aðeins mönnum og prófa eitthvað. Sumt gekk og sumt gekk ekki, en mér finnst Snorri vera kominn með góðan strúktúr á þetta lið. Mér fannst við sjá mikla breytingu milli móta síðast og mér finnst þetta bara líta enn betur út í dag“ bætti Einar við.

Höktandi sóknarleikur og Haukur olli vonbrigðum

Mest allt var jákvætt að hans mati, en einhver áhyggjuefni eru þó til staðar.

„Sóknarleikurinn, ég held að flestir hafi áhyggjur hvað það varðar. Hann á það til að hökta og á það til að vera svolítið sveiflukenndur, eins og við sáum í þessum æfingaleikjum. Fyrri hálfleikarnir voru mjög góðir og seinni hálfleikarnir ekki eins góðir, það er það sem hefur orðið okkur að falli á síðustu mótum“ segir Einar og hann hefði viljað sjá meira frá Hauki Þrastarsyni, stoðsendingahæsta leikmanni þýsku úrvalsdeildarinnar í vetur.

„Ég hefði viljað sjá meira frá Hauki, ég skal bara viðurkenna það. Hann hefur spilað frábærlega í Þýskalandi í vetur og ég var með miklar væntingar til hans, en hann olli mér vonbrigðum í þessum æfingaleikjum. Svo getur vel verið að hann sé bara aðeins að hrista þetta úr sér og komi sterkur inn. Það er fullt af leikjum framundan og hann mun spila mikið.“

Öðruvísi lið sem Ísland á að vinna

Fyrsti leikur Íslands á Evrópumótinu verður svo gegn Ítalíu næsta föstudag og þar spáir Einar öruggum íslenskum sigri.

„Þeir spila aðeins öðruvísi handbolta heldur en flestir og eru með mjög flott lið sem er í uppbyggingu, en þeir ættu ekki að vera nein svakaleg fyrirstaða fyrir okkur. Við eigum bara að vinna Ítalíu“ segir Einar en viðtalið við hann úr Sportpakka Sýnar má sjá í spilaranum að ofan.