Veipverslun fyllir í skarð veitinga­staðar

Vakin er athygli á þessum vendingum í virka íbúahópnum Vesturbænum á Facebook þar sem viðbrögðin eru frekar dræm þótt einn og einn fagni breytingunum.

„Ég hefði átt að versla oftar á Thai Grill - virkilega fínn matur,“ segir Sölvi Snær Magnússon, eigandi veitingastaðarins Laundromat, í hópnum.

„Virkilega sorgleg þróun“

Einn íbúi veltir fyrir sér hvort hin heilaga þrenning sé orðin að veruleika; pítsa, ís og að fá sér í vörina og vísar til þess að Ísbúð Vesturbæjar og Pizza 107 séu í húsinu.

Mest ber á þeim sem vilja ekki fá verslun með nikótín og tóbaksvörur í hverfið barnanna vegna.

„Æ, þetta er glatað. Virkilega sorgleg þróun, ekki síst fyrir ungmennin okkar í hverfinu. Getum við ekki tekið höndum saman og sniðgengið þessa ómenningu?“ spyr ein móðirin.

Hvað í fjandanum er í gangi?

Einn íbúi er þungt hugsi yfir uppgangi nikótínverslana og veipbúða hér á landi.

„Getum við ekki farið að ræða þetta af alvöru? Staðsetning þessara verslana er algjörlega óviðeigandi,“ segir íbúinn.

„Ég meina… hvað í fjandanum er í gangi? Þetta er meðhöndlað eins og nammi hér. Bráðum verður 50% afsláttur um helgar!“

Sambærilegar umræður hafa verið í öðrum hverfum borgarinnar, meðal annars í Grímsbæ við Bústaðarveg í Fossvoginum. Þar rekur Svens verslun en austar í götunni er Póló með útibú. Eyrún Magnúsdóttir, fjölmiðlakona á Gímaldinu og íbúi í Bústaðahverfi, hefur sagt níkótínsölumenn starfa nær óáreitta í skjóli sofandi stjórnvalda hér á landi.

Þeir sem tekið hafa upp hanskann fyrir viðkomandi verslanir hafa aðallega bent á að átján ára aldurstakmark sé í verslununum og því ekki ástæða til að hafa áhyggjur af börnunum.

Lausleg könnun fréttastofu bendir til þess að á höfuðborgarsvæðinu reki Svens um tíu verslanir en Póló um fimm.