Viðskipti innlent

Eld­rauð Kaup­höll

Árni Sæberg skrifar
Kauphöllin er rauð í dag.
Kauphöllin er rauð í dag. Vísir/Vilhelm

Gengi hlutabréfa í flestum félögum Kauphallarinnar hefur lækkað frá því að markaðir lokuðu á föstudag. Sjö félög standa í stað en ekkert félag hefur hækkað. Mest hafa hlutabréf í Amaroq og Skel fjárfestingafélagi lækkað, um 3,78 prósent og 3,59 prósent.

Olíuverð fór yfir 100 dali á tunnu í fyrsta sinn í fjögur ár í nótt. Donald Trump Bandaríkjaforseti sagði í nótt að um væri að ræða „tímabundin“ áhrif átakanna í Mið-Austurlöndum en orkumálaráðherrann Chris Right sagði í samtali við CNN um helgina að truflanir á flutningum myndu aðeins vara vikur, ekki mánuði.

Markaðir hafa hins vegar lækkað í Asíu í morgun; Nikkei 225 um sjö prósent, Kospi í Suður-Kóreu um 7,3 prósent og Hang Seng í Hong Kong um 2,6 prósent.

Svo virðist sem markaðir hér á landi ætli ekki að fara varhluta af ástandinu en Úrvalsvísitalan í Kauphöllinni hefur lækkað um 1,34 prósent það sem af er morgni. Veltan er þó ekki ýkja mikil, um hálfur milljarður króna.

Sem áður segir hafa bréf í Amaroq og Skel lækkað mest, um tæplega fjögur prósent. Gengi fimm félaga til viðbótar hefur lækkað um meira en tvö prósent. Þá vekur athygli að gengi bréfa í Icelandair hefur lækkað um 1,43 prósent og stendur nú í aðeins 0,69 krónum. Það hefur aldrei verið lægra.

Fjármálamarkaðir Árásir Bandaríkjanna og Ísraels á Íran Kauphöllin


Mest lesið


Fleiri fréttir

Sjá meira


×

Mest lesið