Ríkis­stjórnin búin undir báðar niður­stöður

Dómur í máli tveggja lántakenda á hendur Íslandsbanka vegna meintra ólögmætra skilmála í samningum um óverðtryggð lán á breytilegum vöxtum verður kveðinn upp klukkan 13:30.

Falli dómurinn lántakendunum í hag mun Íslandsbanki þurfa að greiða þeim nokkra tugi þúsunda króna en dómurinn verður fordæmisgefandi og mun því geta leitt til þess að þúsundir lántakenda krefji lánveitanda sinn um endurgreiðslu, auk þess sem þeir myndu þurfa að breyta skilmálum sínu. Þannig áætla Íslandsbanki, Arion banki og Landsbankinn að tjón þeirra af því gæti numið samanlagt allt að sjötíu milljörðum króna.

Berghildur Erla Bernharðsdóttir fréttamaður spurði Daða Má Kristófersson, fjármála- og efnahagsráðherra, að loknum ríkisstjórnarfundi í morgun hvort stjórnvöld væru búin undir niðurstöðu Hæstaréttar.

„Já, við erum það. Það hefur verið farið yfir stöðu bankanna, þeir standa sterkt. Íslenskir bankar eru vel fjármagnaðir. Svo verður bara að koma í ljós hver niðurstaðan verður. Við höfum sem sagt farið yfir hvora niðurstöðuna sem gæti komið,“ sagði hann.

Bankarnir séu undirbúnir

Hversu mikið áfall gæti þetta verið verði þetta bönkunum ekki í hag?

„Þú getur auðvitað kallað þetta áfall en þetta yrðu væntanlega gleðifréttir fyrir lánþeganna. Það hleypur auðvitað á milljörðum en þeir eru meðvitaðir um það og hafa gert ráð fyrir því að það gæti farið þannig. En eins og ég segi, ég held að það sé óvarlegt að tjá sig fyrr en dómur fellur.“

Vilt þú eitthvað spá fyrir um málið?

„Nei.“

Mikilvægt að neytendur geti skilið skilmála

Þá segir Daði Már að sama hvernig fari sé almennt mjög mikilvægt að þeir samningar sem neytendum eru boðnir, hvort sem það eru lánasamningar eða aðrir samningar, séu þannig að neytendur séu geti skilið þá.

„Ég held að lærdómurinn sem við þurfum að draga sé að það sé mjög mikilvægt að lán sem eru á breytilegum vöxtum, að þeir breytilegu vextir séu skiljanlegir og að neytendur séu í aðstöðu til þess að meta hver kostnaðurinn er.“