Svört skýrsla um Metro: Mygluvöxtur í kælinum, hættu­legt leik­svæði og hús­næðið „veru­lega vanþrifið“

Heilbrigðiseftirlit Reykjavíkur (HER) hefur í ár ráðist tvisvar í reglubundið eftirlit í kjölfar kvartana frá viðskiptavinum, að því er fram kemur í úttektinni sem Vísir hefur undir höndum.

Ein kvörtun barst 15. júlí um grun um matareitrun átta ára barns sem hafði borðað kjúklinganagga, franskar, tómatsósu og drukkið vatn. Aðeins ein tilkynning um meinta matareitrun barst en þó kom í ljós við eftirlit HER að hitastigseftirlit hafði verið óvirkt í fyrirtækinu daginn sem meint matareitrun átti sér stað, 10. júlí, og var enn óvirkt þegar úttektin var gerð 15. júlí, þrátt fyrir að kúnninn hefði haft samband við fyrirtækið 11. júlí.

Óvarðir ofnar og laust net í leikkastalanum

Önnur kvörtunin hafði borist 12. apríl og sneri að leikhorni Metro á Suðurlandsbraut þar sem kvartandi sagði að leikhornið væri „hættulegt börnum þar sem öryggisnet hjá þeim er tætt og börn komast upp á þakið í ca 3 metra hæð“.

HER fór í eftirlit í kjölfar kvartanar og staðfesti að öryggisnetið væri laust og auðvelt væri að klifra upp á topp kastalans. Leiksvæðið þarfnast því viðhalds en einnig þarf að taka til inni í kastalanum, þar sem mikið er um sprungna bolta.

„Ekki var hægt að sýna fram á nein gögn um innra eftirlit með leiksvæðinu. Rekstraraðili var búinn að koma upp skriflegu verklagi við innra eftirlit, þrif og viðhald en það virðist hafa dottið upp fyrir,“ skrifar fulltrúi HER. Enn fremur kom fram í nýjustu úttektinni að ekki hafi verið brugðist við þeirri kvörtun með fullnægjandi hætti.

Enn voru óvarðir ofnar inni á leiksvæðinu. „Lagnir sem eru utan á liggjandi og flytja heitt vatn þarf að hylja þannig að börn geti ekki brennt sig á þeim.“ Leikvallatæki voru enn verulega slitið og þarfnaðist enn allsherjarviðhalds eða endurnýjunar, og enn þurfti að yfirfara alla bolta og fjarlægja þá bolta sem væru í ólagi.

Brotnar flísar, skítugt gólf og mygluvöxtur

En við eftirlit komu enn fleiri frávik í ljós, nánar tiltekið 43 frávik til viðbótar. Flest atriði átti að lagfæra fyrir 30. júlí 2025, sum með hærri forgang fyrir 23. júlí en ekki liggur fyrir hvort brugðist hafi verið við frávikunum sem HER bendir á.

Fulltrúi HER skráði hjá sér að ræstiaðstaða hefði verið ólæst í eftirliti, þrátt fyrir að hún ætti ávallt að vera læst til að tryggja að börn og óviðkomandi kæmust ekki í hættuleg efni.

Gólf og efnaskápur í ræstiaðstöðu voru óhrein einnig óhrein og þrifum á snyrtingum var ábótavant. 

Gólfþrifum í veitingarými hafi einnig verið ábótavant og gólfið klístrað svo að skór límdust við. Skammtari fyrir handgerileyði var óvirkur, skrifar HER. Hvorki hafi verið hægt að fá skammtaðan handgerileyði handfrjálst né með því að þrýsta á pumpuna.

Skýrslur eða kvittanir frá þjónustuaðila vegna þrifa á loftræsikerfi hafi ekki verið aðgengilegar til skoðunar í eftirliti. HER benti á að mikilvægt væri að loftræsikerfi væri þrifið reglulega vegna þess að mikil steiking og djúpsteiking valdi uppsöfnun fitu í loftræsikerfi.

Þá kom fram að árekstrarvarnir á veggjum hafi þarfnast endurnýjunar og að flísar á vegg undir þvottavél hafi verið brotnar.

Gólfdúkur í manngengum kæli hafi verið laus frá gólfi og bungað upp, slæmur frágangur á samskeytum gólfdúksins við veggi kælisins. Þessi athugasemd hafði verið gerð áður og hefur ástandið nú ágerst, en nú er greinilegur mygluvöxtur á kælisgólfi. 

„Grípa þarf til tafarlausra úrbóta,“ skrifar HER um mygluna.

Matvæli geymd óvarin í frystikistu

Í úttektinni segir enn fremur að ljós hafi verið óvirk á mörgum stöðum og sjáanleg slikja á stúti klakavélar í veitingasal. Þá voru einnig sjáanleg óhreinindi í klakavélinni baksvæðis.

Einangrunarefni væri orðið slitið á lögnum á gólfum í lager á efri hæð. HER benti á að hætt væri við agnalosun úr einangrunarefninu sem getur mengað matvælaumbúðir, leikföng og matvæli sem geymd eru í lagernum. Fara þyrfti yfir og endurnýja þarf brotin áhöld og búnað. 

Plastið á uppþvottagrindum var farið að flagna og kvarnast og skýrslur frá þjónustuaðila uppþvottavélar vegna eftirlits með hitastigi og sápumagni voru ekki aðgengilegar til skoðunar að sögn HER. 

Matvæli voru einnig geymd óvarin í frystikistu. Þá skrifar HER að samræmisyfirlýsingar fyrir snertiefni úr plasti og gögn um snertiefni sem ekki eru úr plasti hafi ekki verið aðgengilegar til skoðunar í eftirliti.

„Fara þarf í alþrif“

„Húsnæði og búnaður verulega vanþrifið. Fara þarf í alþrif,“ segir í skýrslunni, þar sem einnig er bent á að ekki sé sérstakur ræstiklefi fyrir efni og áhöld til ræstinga á eldhúsi. Þrifaskráningar hafi enn fremur fallið niður og þrufti þarf að virkja á ný.

Skýrslur, kvittanir eða skráningar vegna þrifa Expert og Ölgerðarinnar á gosdælum hafi heldur ekki verið aðgengilegar til skoðunar í eftirliti. „Að sögn var skipt yfir í gosdrykki frá Ölgerðinni fyrir um mánuði síðan og þess vegna ekki kvittanir til staðar frá þeim Hins vegar hefði átt að halda utan um kvittanir frá Expert vegna þrifa á gosdælum fram að þeim tíma sem Ölgerðin tók við.“

HER bent enn fremur á að þjálfunaráætlun væri ekki til staðar eða að öðru leyti ekki í notkun. Þjálfunaráætlun fyrir atriði sem varða matvælaöryggi og innra eftirlit þurfi aftur á móti að vera til staðar og þarf að halda skriflega utan um hver hefur hlotið hvaða þjálfun.

Þannig var ekki hægt að leggja mat á eftirlitsatriði þar sem gögn um þjálfun starfsfólks voru ekki aðgengileg í eftirliti. Sýna þurfi fram á að allt starfsfólk hafi hlotið þjálfun í matvælaöryggi og því innra eftirliti sem starfsstöðin starfrækir.

HER srifar að sttarfsólk hafi verið látið þrífa vinnufatnað heima hjá sér og að þvottavél og þurrkari væru í uppvasksrými, sem er ekki viðeigandi staður. Fulltrúar Metró segja þetta nýja kröfu að hálfu heilbrigðiseftirlitsins.

Óvirkt matvælaöryggiskerfi

HER bendir á það vanti viðbrögð við frávikum. Skriflegt verklag við upphitun matvæla hafi heldur ekki verið til staðar eða að öðru leyti ekki í notkun en verklagið skal skilgreina viðmiðunarmörk og viðbrögð við frávikum.

Engar skráningar á hitastigi eigi sér heldur stað við eldun matvæla og ekki í hitaborðum. Auk þess voru engar skráningar til staðar vegna eftirlits með hitastigi kæla, frysta og kæliborða. Enn fremur hafi engar skráningar hafi verið vegna eftirlits með hitastigi kæla, frysta og kæliborða.

Enn fremur var bent á að skráningar vegna móttökueftirlits hafi fallið niður eða væru að öðru leyti ekki virkar. 

Matvælaöryggiskerfi starfsstöðvarinnar hafi einnig verið óvirkt en fulltrúi HER skrifar hjá sér að virkja þurfi innra eftirlit og skráningu vegna þess, sem nái að lágmarki til þeirra athugasemda sem gerðar voru í eftirlitsskýrslunni. Einnig var gerð athugasemd við það að hitastig matvæla í efri hillu í hitaborði fyrir tilbúna borgara mældist undir 60°C með yfirborðshitamæli.

Þá er bent á að sorpflokkunarílát vanti fyrir gesti í veitingasal og að allt sorp gesta fari í almennt rusl.

„Auka þarf sorpflokkun í Metro,“ skrifar fulltrúi HER og bendir á að eingöngu pappi og notuð steikingarolía séu flokkuð. Allt annað fari í almennt.  Þá var bent á að fita úr fituskilju hafi lekið út á gólf.

Segjast búin að bregðast við nánast öllu

María Rún Hafliðadóttir, framkvæmdastjóri Metró, segir í samtali við fréttastofu að sum af þeim atriðum sem komu fram í úttektinni hafi komið á óvart en sum séu vegna breyttra krafna um heilsuhætti.

Búið sé að bregðast við öllum nema þremur atriðum, meðal annars gæðavottun um umbúðir og breytingum á húsnæði vegna breyttra krafna um þvottavélar.

Heildarniðurstaða í úttekt HER á Metró er 77 af 131, eða tæplega sex af tíu. Þar af voru 45 athugasemdir flaggaðar og 54 úrbóta krafist.

Í desember 2021 réðst HER í úttekt á sama veitingastað Metro og fékk þar einn í einkunn af fimm mögulegum, að því er DV greindi frá.