Vilja herða reglur um frá­gang rafhlaupahjóla í Reykja­vík

Í nýjum reglum er til dæmis tekið fram að ekki megi leggja hjólum við vatnsverndarsvæði, á göngugötum, í undirgöngum eða í nágrenni þeirra, og á hjólastígum. Þá segir að borgin megi setja upp bannsvæði, lághraðasvæði og geti sett skilyrði um hvenær eigi að fjarlægja tækin. Þá er einnig að finna lýsingu á útbúnaði og fjallað um lýsingu og endurskin. Tækin eigi til dæmis að vera með blikkandi ljós hafi þau fallið á hliðina.

„Við erum að skerpa á verklagsreglum um hjóla- og smáfarartækjaleigur og ég veit að það eru miklar skoðanir á þessu. Skúturnar eru æði en líka áskorun og við viljum tryggja að reglurnar mæti því. Þess vegna bað ég um að reglurnar myndu fá rýni almennings og hagaðila fyrir samþykkt reglnanna,“ segir Dóra Björt Guðjónsdóttir, oddviti Pírata í Reykjavík og formaður umhverfis- og skipulagsráðs, í Facebook-færslu.

Núgildandi verklagsreglur eru frá árinu 2019 og voru samþykktar áður en nokkur slík leiga tók til starfa í borginni. Í dag eru í það minnsta þrjár slíkar leigur starfandi, Hopp, Zolo og Bolt.

Í lýsingu í samráðsgáttinni segir að reglurnar sem séu í gildi setji ramma um viðkomandi starfsemi en að nú, sex árum síðar, sé tímabært að endurskoða reglurnar. Breytingarnar sem birtist í drögunum snúi að mestu leyti að því að skýrari kröfur verði gerðar til rekstraraðila um að fylgja því eftir að tækjunum sé ekki lagt þannig að það skapi hættu eða óþægindi fyrir aðra vegfarendur.

Íbúar Reykjavíkur og aðrir hagaðilar eru hvattir til að senda inn ábendingar við meðfylgjandi drög að uppfærðum verklagsreglum. Umhverfis- og skipulagsráð tekur endanlega ákvörðun um verklagsreglur vegna starfsemi stöðvalausra hjóla- og smáfarartækjaleiga á borgarlandi Reykjavíkur.

Þegar fréttin er skrifuð er búið að skila inn 24 umsögnum. Flestar eru faldar en í þeim sem hægt er að lesa má sjá að margir hafa skoðun á því hvernig skilið er við hjólin og að erfitt sé að sjá þau í myrkri, þegar þau eru skilin eftir, og sérstaklega ef þau liggja á jörðinni.

Sjáist ekki á hlið í myrkri

„Krafa um aukinn sýnileika hjólanna til að minnka slysahættu þegar þau eru ekki í notkun og þeim misjafnlega lagt eins og gengur. T.d. ef þau liggja þvert á hjólastíg er mikilvægt í myrkri að það sé endurskin á botninum á hjólunum þar sem hann er oftar en ekki svartur og sést mjög illa í myrkri,“ segir í einni umsögninni og í annarri:

„Hlaupahjól eru alltof oft skilin eftir á gangstíg eða á hjólastíg fyrir annarri umferð, þá ýmist gangandi eða hjólandi. Fyrir fólk sem er á reiðhjóli þá getur þetta oft verið beinlínis hættulegt og þá sérstaklega í myrkri. Hlaupahjólin er skilin eftir á stígnum, eða við stíginn þar sem smá fallhætta getur orðið og hlaupahjólið því auðveldlega fallið og þverað stíginn. Ég hef hjólað á hlaupahjól í myrkri sem var fallið og þveraði stíginn þannig. Ég var með mín sterkustu ljós kveikt en þar sem botninn á hlaupahjólinu var svartur og sú hlið sneri að mér þá féll það saman við malbikið. Ég féll og hjólið mitt með en sem betur fer gekk ég heill frá því og hjólið líka.“

Þá er kallað eftir því í mörgum umsögnum að sett verði upp safnstæði fyrir hjólin þar sem þau eru skilin eftir og sótt. Í umsögnum segir að slík stæði sé til dæmis að finna í Kaupmannahöfn, á Tenerife og í Litháen.

„Ég mæli með að sett verði skýr og afmörkuð stæði fyrir rafhlaupahjól, og að sú lausn verði algild í allri borginni. Slík stæði ættu að koma í stað þess að notendum sé leyft að skilja hjólin eftir hvar sem er. Sérstaklega þarf að forðast að rafhlaupahjólum sé lagt á gangstéttum og hjólastígum þar sem þau geta skapað hættu og hindrað aðgengi. Með nútímatækni er einfalt að afmarka svæði þar sem leyfilegt er að leggja rafhlaupahjólum þannig að þau valdi ekki truflunum eða hættu fyrir aðra vegfarendur – og þjónustuveitendur hafa tæknilega getu til að stýra því hvar notendur mega ljúka ferðum sínum,“ segir í einni umsögninni.

Þá er einnig að finna í umsögnum tillögur um að lækka hámarkshraða þeirra og að fyrirtæki hafi heimild til að refsa notendum fyrir ítrekaðan lélegan frágang.