Næstum því ótrú­leg endur­koma Wa­les í Belgíu

Undankeppni fyrir heimsmeistaramótið sem fram fer í Bandaríkjunum næsta sumar er komið á fulla ferð þrátt fyrir að Ísland hafi ekki enn hafið leik. Nokkrir leikir fóru fram í kvöld og var nokkuð um áhugaverð úrslit.

Í Belgíu var Wales í heimsókn og þegar hálftími var liðinn stefndi í stórsigur heimamanna, staðan 3-0 og allt í blóma þökk sé mörkum Romelu Lukaku, Youri Tielemans og Jérémy Doku.

Harry Wilson minnkaði muninn með marki af vítapunktinum þegar komið var langt fram yfir venjulegan leiktíma í fyrri hálfleik. Það mark gaf gestunum aukna trú og Wilson lagði upp annað mark Wales sem Sorba Thomas skoraði snemma í síðari hálfleik. Brennan Johnson fullkomnaði svo endurkomuna með jöfnunarmarki þegar tuttugu mínútur lifðu leiks eftir undirbúning Thomas.

Þegar tíu mínútur voru til leiksloka lagði Doku boltann á Lukaku sem skoraði með skoti sem fór af varnarmanni gestanna. Staðan orðin 4-3, eða hvað? 

Í miðjum fagnaðarlátum Belga kom í ljós að myndbandsdómari leiksins ætlaði sér að skoða markið nánar. Á endanum var markið dæmt af og staðan því enn 3-3. Þetta sló hins vegar ekki Belgana af laginu og þegar tvær mínútur voru til loka venjulegs leiktíma steig Kevin De Bruyne upp og skilaði knettinum í netið eftir fyrirgjöf Tielemans. 

Staðan aftur orðin 4-3 og nú stóð markið. Reyndust það lokatölur í þessum stórskemmtilega leik. Belgía er með 4 stig í 3. sæti J-riðils að loknum tveimur leikjum á meðan Wales er sæti ofar með 7 stig eftir að hafa spilað 4 leiki.

Í Eistlandi vann Noregur 1-0 útisigur þökk sé markamaskínunni Haaland. Hann hefur nú skorað 42 mörk í 43 A-landsleikjum fyrir Noreg.

Noregur er áfram með fullt hús stiga í I-riðli að loknum fjórum leikjum. Meðal sigranna er ótrúlegur 3-0 sigur á Ítalíu sem tók á móti Moldóvu í kvöld. 

Vann Ítalía nokkuð þægilegan 2-0 sigur þökk sé mörkum Giacomo Raspadori og Andrea Cambiaso. Ítalía er því komið á blað með þrjú stig í 3. sæti en hefur aðeins spilað tvo leiki til þessa.

Í Færeyjum kom James Scanlon, 18 ára gamall leikmaður Manchester United, gestunum frá Gíbraltar yfir. Arni Frederiksberg, ein af hetjunum úr Evrópuævintýrum KÍ Klaksvíkur, jafnaði metin og Patrik Johannesen, fyrrverandi leikmaður Keflavíkur og Breiðabliks, tryggði sigurinn með marki á 86. mínútu.

Gunnar Vatnhamar, leikmaður Víkings Reykjavíkur, spilaði allan leikinn í hjarta varnarinnar hjá Færeyjum. Brandur Hendriksson, sem lék með FH árin 2018 og 2019 var einnig í byrjunarliðinu.

Færeyingar eru nú með þrjú stig að loknum þremur leikjum í L-riðli á meðan Gíbraltar er án stiga. Króatía vann þá 5-1 sigur á Tékklandi og er með 6 stig að loknum tveimur leikjum á meðan Tékkar halda toppsætinu með 9 stig eftir fjóra leiki.