Vilja færa skipulagsvald al­þjóða­flug­valla til ríkis

„Skipulagsvald yfir landi sem notað er til varnarmála og reksturs alþjóðaflugvalla skal vera á forræði ríkisins,“ segir í samþykkt sjálfstæðismanna.

Keflavíkurflugvöllur nýtur raunar sérstöðu í skipulagsmálum. Hann er eini alþjóðaflugvöllur landsins þar sem skipulagsvaldið er ekki á forræði viðkomandi sveitarfélaga. 

Þar hefur Skipulagsnefnd Keflavíkurflugvallar, sem heyrir undir innviðaráðherra, umsjón með skipulagsmálum á sveitarstjórnarstigi og veitir lokaákvörðun um deili- og aðalskipulag flugvallarsvæðisins. Ráðherra skipar alla fimm nefndarmenn, þar af einn samkvæmt tilnefningu frá utanríkisráðuneyti og tvö samkvæmt tilnefningu sveitarfélaga á Suðurnesjum.

Skipulagsvald hinna þriggja alþjóðaflugvalla landsins heyrir undir viðkomandi sveitarfélög. Þeir eru Reykjavíkurflugvöllur, Akureyrarflugvöllur og Egilsstaðaflugvöllur. Samkvæmt samþykkt landsfundarins vill Sjálfstæðisflokkurinn að það sama gildi um þessa þrjá flugvelli og Keflavíkurflugvöll; að ríkið fari með skipulagsvald þeirra allra.

Leiða má líkur að því að þau áralöngu átök, sem verið hafa um Reykjavíkurflugvöll, einkum á milli borgarstjórnar Reykjavíkur og ríkisvaldsins, séu kveikjan að samþykkt sjálfstæðismanna. Nýjasta dæmið er sá dráttur sem varð á því að borgaryfirvöld létu lækka trjágróður í Öskjuhlíð, sem leiddi til þess að einni flugbraut vallarins var lokað.

Lokun flugbrautarinnar varð til þess að bæjar- og sveitarstjórar tíu landsbyggðarsveitarfélaga, sem mikið eiga undir flugsamgöngum, birtu sameiginlega grein á Vísi í síðasta mánuði þar sem þeir mótmæltu því að trjágróður í Öskjuhlíð nyti forgangs þegar um líf og heilsu fólks utan af landi væri að ræða. Sögðu að öllum mætti vera ljóst að Reykjavíkurflugvöllur færi ekki burtu úr Vatnsmýrinni á næstu árum eða jafnvel áratugum. Ennfremur að allt tal um að flytja innanlandsflugið til Keflavíkur lýsti skilningsleysi á aðstöðu þeirra sem byggju úti á landi.

Hugmyndin um að ríkið taki yfir skipulagsvald allra alþjóðaflugvallanna er ekki ný. Þannig varpaði Njáll Trausti Friðbertsson, þáverandi bæjarfulltrúi á Akureyri og núverandi þingmaður Sjálfstæðisflokksins, þessari hugmynd fram í bæjarstjórn Akureyrar árið 2015. Njáll var á sínum tíma annar forsvarsmanna Hjartans í Vatnsmýri, undirskriftasöfnunar til stuðnings flugvellinum.