Segir úlfalda gerðan úr mý­flugu

Haukur Arnþórsson stjórnsýslufræðingur sagði í gær að siðareglur fyrir alþingismenn hindruðu aðkomu Sigurjóns Þórðarsonar að vinnu við lagabreytingar á strandveiðikerfinu, vegna eignarhlutar hans í strandveiðibáti. Siðareglurnar hafi áhrif á hæfi hans til að fjalla um einstök mál eins og strandveiðar, en ekki hæfi hans til að sitja sem formaður. 

Þá hefur verið greint frá því að ekki hafi verið greint frá strandveiðum Sigurjóns í hagsmunaskráningu þingmanna frá árinu 2023. Hagsmunaskráningin var fyllt út þegar Sigurjón tók sæti sem varaþingmaður, en hann segir að hann hafi ekki farið á veiðar það árið, og því sé ekkert rangt í hagsmunaskráningunni.

Úlfaldi gerður úr mýflugu

Sigurjón segir að þegar menn líti á tekjurnar af strandveiðum hans, sjái menn að hagsmunirnir séu óverulegir. Viðskiptamódel hans hafi fyrst og fremst verið að eiga fyrir kostnaðinum við rekstur bátsins.

„Þannig það er verið að gera úlfalda úr mýflugu,“ segir hann.

„Þetta eru það miklu minni hagsmunir og miklu minni tekjur sem ég hef nokkurn tímann haft af þessu en öðru sem ég hef tekið mér fyrir hendur, og þetta er bara algjörlega óverulegt. Þetta snýst um almenn lög fyrir alla landsmenn, en ekki eitthvað sem bara ég mun fá,“ segir Sigurjón.

Sigurjón segir að ályktanir hafi verið gefnar út í sambærilegum málum og hans, og þar hafi verið komist að því að þetta væru óverulegir hagsmunir.

„Jafnvel bændur geta verið formenn atvinnuveganefnda, þeir eru stöðugt að fjalla um sín mál. Og mega eldri borgarar þá ekki fjalla um lífeyrismál?“ segir hann.

Lilja Rafney Magnúsdóttir var formaður atvinnuveganefndar Alþingis kjörtímabilið 2017 - 2021, en eiginmaður hennar rekur strandveiðibát á Suðureyri. Lilja Rafney sagði sig úr Vinstri grænum í fyrra þegar flokkurinn samþykkti frumvarp um kvótasetningu grásleppunnar. Hún bauð sig fram fyrir Flokk fólksins í nýafstöðnum kosningum og hlaut kjör.

Þjóðhagslega hagkvæmt að endurskoða kerfið og bæta í veiðarnar

Í stefnuyfirlýsingu ríkisstjórnarinnar kemur fram að til standi að bæta í strandveiðarnar og tryggja 48 daga veiðitímabil á hverju sumri. Síðastliðin ár hafa veiðar verið stöðvaðar þegar heildarpottur strandveiðikvótans, um 10 þúsund tonn, er kláraður, og hefur það iðulega gerst um miðjan júlí.

Engar útfærslur hafa verið kynntar í þeim efnum og ekkert liggur fyrir um hvaðan kvótinn eigi að koma.

Sigurjón Þórðarson hefur sterkar persónulegar skoðanir á stjórn fiskveiða, en hann telur þjóðhagslega hagkvæmt að endurskoða allt kerfið og bæta verulega í fiskveiðar.

„Við erum að veiða núna árið 2025, ríflega 120 þúsund tonn, en við veiddum 60 prósent meira árið 1925 fyrir hundrað árum síðan. Þannig menn geta alveg lagst rólegir á koddan hjá Morgunblaðinu þótt menn fái að veiða nokkra þorska hér hringinn í kringum landið,“ segir hann.

„Ég held það sé þjóðhagslega hagkvæmt að endurskoða kerfið og bæta verulega í veiðarnar.“

Hann segir að ekki liggi fyrir að ráðast í slíkar róttækar breytingar á fiskveiðistjórnunarkerfinu á komandi kjörtímabili, en hann vonist til þess að ná fram jákvæðri umræðu.

„Ég held að sú umræða þurfi að dýpka. Ég held það sjái það flestir að þetta er ekki að ganga upp,“ segir Sigurjón.

Haukur Arnþórsson stjórnsýslufræðingur sagði Sigurjón ekki vanhæfan til að leiða nefndina heldur til að fjalla um strandveiðar vegna hagsmuna sinna. Fjallað er um það í annarri frétt hér. Fréttin hefur verið uppfærð 3.2.2025 klukkan 08:48.