Færslan vakti mikla athygli þegar hún var birt á Facebook-síðu lögreglunnar á Norðurlandi eystra. Þar fer lögregla yfir málavexti og útskýrir hvers vegna málið, sem var til rannsóknar í rúm þrjú ár, hafi verið fellt niður. Auk eiginkonunnar voru sex blaðamenn með réttarstöðu sakbornings í málinu.
Í færslunni segir meðal annars að framburður konunnar hafi verið stöðugur allan tímann um að hún hafi afhent fjölmiðlum símann. Í samtali við Heimildina segir lögmaður konunnar, Hólmgeir Elías Flosason, þetta vera alrangt og að hann hafi upplýsingar undir höndum sem dragi fram að lögregla fari með ósannindi í færslunni.
Ólíklegt að ákæruvaldi takist að sanna ásetning
Lögregla sagði í færslunni að fyrir hafi legið að að einn sakborninga, umrædd kona, hafi játað að hafa sett lyf út í áfengi sem hún færði Páli og hann drakk. Lögreglustjóraembættið á Norðurlandi eystra hafi talið þessa háttsemi varða við hegningarlög. Ekki væri búið að sýna fram á orsakatengsl á milli byrlunar og veikinda brotaþola, en þó að lögreglu tækist það, væri ólíklegt að ákæruvaldinu tækist að sanna ásetning eiginkonunnar fyrrverandi til að valda Páli þeim skaða sem hann varð fyrir.
Þá sagði lögregla að sakarefni sem sneru að því að dreifa kynferðislegu myndefni af Páli, líklegt til sakfellis á hendur einum einstaklingi og átti þar við um konuna. „Brotið felst í því að sakborningur sendi sjálfum sér kynferðislegt myndefni af eiginmanni sínum úr síma hans“. Vegna veikinda sakbornings haf vafi leikið á um hvort hann hafi verið sakhæfur á verknaðarstundu. „Sakborningur hefur hafnað beiðni um að undirgangast sakhæfismat og því hefur verið ákveðið að hætta rannsókn á þessum þætti málsins,“ sagði í færslunni.
Veikindi nýtt til eftiráskýringa
Í samtali við Heimildina segir lögmaðurinn það tvískinnung að vísa til veikinda konunnar með þessum hætti.
„Þegar á sama tíma fannst þeim algjörlega tilhlýðlegt að draga hana í tvígang fyrir dóm í aðalmeðferð. Þeir mátu það þannig að hún væri til þess bær að koma fyrir dóm. Þá var bæði hún og blaðamennirnir með réttarstöðu sakborninga misserum og árum saman án þess að lögreglan gerði handtak í rannsókninni,“ er haft eftir Hólmgeiri. Um eftiráskýringar sé að ræða þar sem lögregla reynir að breiða yfir eigin klúður.
„Lögreglan er að reyna að fegra sinn hlut og reyna að skýra þennan drátt með vísan til hennar veikinda,“ segir hann.
Hólmgeir telur alvarlegt að lögregla gangi fram gegn borgurunum með þessum hætti og kallar eftir opinberri rannsókn á vinnubrögðum lögreglu. „Það er ekki hægt að láta þetta bara kyrrt liggja. Ég get ekki séð að þessu máli sé lokið,“ sagði hann.
Sigríður Dögg Auðunsdóttir, formaður Blaðamannafélags Íslands, hefur sömuleiðis hneykslast á rannsókn lögreglu og fyrrgreindri færslu sem hún segir einsdæmi. Þá lét hæstaréttarlögmaðurinn Jakob R. Möller hafa eftir sér í samtali við Morgunblaðið að lögregla hafi „ekkert vitað hvað hún væri að gera.“
Annar hæstaréttarlögmaður, Sigurður G. Guðjónsson, segir að sér þyki ólíklegt að málið sé lokið með niðurfellingu lögreglu. Hann eigi erfitt með að sjá hvernig ríkissaksóknari komist hjá því að taka málið upp á ný. Ákvörðun um að kæra málið af hálfu Páls skipstjóra hefur hins vegar ekki verið tekin, að sögn Evu Hauksdóttur, lögmanns Páls.
