Rubiales bauð Vilda nýjan ofursamning í varnarræðu sinni

Sápuóperan í kringum Rubiales hélt áfram á fundi spænska knattspyrnusambandsins í dag. Í stað þess að segja af sér hélt Rubiales mikla varnarræðu, hrópaði fjórum sinnum að hann myndi ekki segja af sér og sagði gagnrýnendum sínum til syndanna.

„Þetta var bara smá koss. Það var engin þrá eða drottnun þarna, þetta var eins og ég væri að kyssa dóttur mína. Þetta gerðist í hita augnabliksins og báðir aðilar voru samþykkir. Ég á í frábæru sambandi við alla leikmennina og við eigum innileg augnablik,“ sagði Rubiales og lýsti því næst atvikinu þegar hann rak Jennifer Hermoso rembingskossinn alræmda eftir úrslitaleik HM þar sem Spánn vann England, 1-0.

„Jenni reisti mig við. Við féllumst í faðma og ég sagði henni að gleyma vítaspyrnunni sem hún klikkaði á og sagði að hún hefði átt frábært mót. Ég spurði hvort ég mætti aðeins kyssa hana og hún sagði já. Þetta er samfélagslegt morð. Þeir eru að reyna að drepa mig. Við Spánverjar verðum að skoða hvert við erum að fara. Falsfemínismi leitar hvorki að réttlæti eða sannleikanum. Honum er sama um fólk.“

Rubiales er ekki sá eini sem kom sér í klandur með framkomu sinni í kringum úrslitaleik HM. Þjálfari spænska liðsins, Jorge Vilda, kleip nefnilega í brjóst samstarfskonu sinnar í spænska þjálfaraliðinu.

Vilda er afar umdeildur en frægt er þegar fimmtán leikmenn spænska landsliðsins skrifuðu undir bréf þar sem þjálfunaraðferðir hans voru harðlega gagnrýndar og að hann hafi haft slæm áhrif á andlega og líkamlega heilsu leikmanna.

Rubiales hefur alltaf staðið þétt við bakið á Vilda og ítrekaði stuðning sinn við hann í varnarræðunni miklu í dag. Hann bauð honum nýjan fjögurra ára samning sem mun færa honum hálfa milljón evra í árslaun.

„Jorge Vilda, þeir vildu gera það sama við þig og þeir eru að gera við mig núna. Við höfum gengið í gegnum ýmislegt en alltaf saman,“ sagði Rubiales.

Fjölmargir hafa gagnrýnt Rubiales fyrir framkomu hans eftir úrslitaleikinn, þar á meðal forsætisráðherra Spánar, Pedro Sánchez. Hermoso og leikmannasamtökin FIFPRO hafa óskað eftir því að tekið verði á hegðun Rubiales og þá er mál hans komið inn á borð FIFA.

Rubiales hefur verið forseti spænska knattspyrnusambandsins undanfarin fimm ár. Vilda hefur þjálfað kvennalandsliðið síðan 2015.