Öruggur sigur strákanna en stelpurnar töpuðu í lokin

Þetta varð ljóst eftir afar öruggan sigur Íslands gegn Barein í dag, 34-28, á HM U19 karla, og 25-21 tap Íslands gegn Sviss á EM U17 kvenna.

Í leik U19-landsliðs karla við Barein var aldrei mikil spurning hvernig færi, þó að Barein kæmist reyndar í 6-4 í upphafi leiks. Íslensku strákarnir svöruðu með fjórum mörkum í röð og voru 19-13 yfir í hálfleik. Liðið hélt svo góðu forskoti allan seinni hálfleikinn.

Framarinn Reynir Þór Stefánsson var valinn maður leiksins en hann skoraði sex mörk og var markahæstur í dag. Elmar Erlingsson og Eiður Rafn Valsson skoruðu fimm mörk hvor og Össur Haraldsson fjögur.

Eftir að hafa naumlega misst af sæti í milliriðlakeppninni og því farið yfir í Forsetabikarinn svokallaða, hafa íslensku strákarnir unnið örugga sigra á Suður-Kóreu og Barein. Svíar hafa sömuleiðis unnið stórsigra gegn Bandaríkjunum og Argentínu.

Ísland og Svíþjóð mætast á fimmtudaginn og mun sigurliðið spila um 17. sæti við sigurliðið úr leik Marokkó og Svartfjallalands. Tapliðin mætast í leik um 19. sæti.

Stelpurnar misstu niður forystuna gegn Sviss

Stelpurnar í U17-landsliðinu eru enn stigalausar í sínum riðli í baráttunni um 9.-16. sæti á EM í Svartfjallalandi, eftir tapið gegn Sviss í dag. Svíþjóð tapaði 30-27 fyrir Tékklandi sem er með fullt hús stiga, en áður hafði Svíþjóð unnið Sviss með einu marki.

Sviss var 13-12 yfir í hálfleik í dag en Ísland komst svo yfir og var meðal annars 18-16 yfir, áður en Sviss náði forystunni á nýjan leik og skoraði svo fjögur af sex síðustu mörkum leiksins.

Það er því allt útlit fyrir að Ísland spili um 13.-16. sæti á mótinu en með átta marka sigri gegn Svíþjóð á morgun gæti Ísland farið í leikina um 9.-12. sæti, ef Sviss vinnur ekki Tékkland.

Ásthildur Þórhallsdóttir og Dagmar Guðrún Pálsdóttir voru markahæstar Íslands gegn Sviss í dag með fimm mörk hvor, og Lydía Gunnþórsdóttir skoraði fjögur.