Magnað að sjá bara vatnsgufu úr hreyflinum en enga mengun

Kristján Már Unnarsson skrifar 7. mars 2023 22:20

Heiða Njóla Guðbrandsdóttir verkfræðingur er aðstoðarframkvæmdastjóri rekstrarsviðs Icelandair. Hún spjallaði við flugmennina eftir fyrsta tilraunaflug vetnisknúinnar farþegaflugvélar í Washington-ríki í Bandaríkjunum fyrir helgi. Steingrímur Dúi Másson

Stórri farþegaflugvél, sömu gerðar og Icelandair notar í innanlandsfluginu, hefur í fyrsta sinn í sögunni verið flogið á vetni. Fulltrúi Icelandair var viðstaddur þetta tímamótaflug vestanhafs en þetta er meðal þeirra lausna sem félagið skoðar til orkuskipta í fluginu á Íslandi.

Í fréttum Stöðvar 2 mátti sjá Dash 8-flugvél Universal Hydrogen taka á loft frá alþjóðaflugvellinum í Moses Lake í Washington-ríki í Bandaríkjunum síðastliðinn fimmtudag. Í stað þess að smíða nýjar flugvélar frá grunni þróar Universal Hydrogen þá leið til orkuskipta að umbreyta hreyflum og eldsneytiskerfum svo vélarnar verði vetnisknúnar.

Tilraunaflugvél Universal Hydrogen, Dash 8-300, lyftir sér af jörðinni í fyrsta flugtakinu.Universal Hydrogen

Til að gæta fyllstu varúðar í þessu fyrsta tilraunaflugi var þó aðeins annar hreyfillinn knúinn vetni en hinn venjulegu þotueldsneyti. Með viljayfirlýsingu frá árinu 2021 er Icelandair samstarfsaðili Universal Hydrogen og var með sinn sérfræðing á staðnum, Heiðu Njólu Guðbrandsdóttur, aðstoðarframkvæmdastjóra rekstrarsviðs.

Hún segir stemmninguna á flugvellinum hafa verið engu líka þegar flugmennirnir stigu frá borði að fluginu loknu. Þeim hafi verið fagnað eins og ofurhetjum.

Eftir lendingu eru ný fullhlaðin vetnishylki sett aftast í vélina.Universal Hydrogen

„Það er líka magnað að sjá vél á flugi þar sem kemur bara vatnsgufa út úr mótornum en engin mengun,“ segir Heiða Njóla, en glöggir áhorfendur geta vonandi greint vatnsgufuna í sjónvarpsfréttinni sem fylgir.

„Og ég fékk einmitt tækifæri til að ræða þarna við flugmennina sem höfðu flogið vélinni. Auðvitað var fyrsta spurningin: Hvernig var tilfinningin?

Hann sagði orðrétt: Þetta var bara eins og að fljúga Dash 8,“ hefur Heiða eftir flugstjóranum.

Icelandair notar flugvélar af gerðinni Dash 8-200 og Dash 8-400 í innanlandsfluginu.Vilhelm Gunnarsson

Dash 8 er einmitt sú tegund sem Icelandair notar á innanlandsleiðum og einnig sú sem Landhelgisgæslan notar. Með reynsluflugi Universal Hydrogen varð þessi tegund stærsta flugvél sögunnar til að fljúga á vetni með efnarafali.

„Og meira að segja þá drógu þau af þegar þau voru komin í loftið. Þannig að þau flugu í rauninni nær eingöngu á vetninu. Það eru líka stór tímamót,“ segir Heiða.

Flugvél Landhelgisgæslunnar, TF-SIF, er af gerðinni Dash 8-300. Gangi áætlanir Universal Hydrogen eftir væri einnig unnt að gera hana vetnisknúna árið 2025.Vilhelm Gunnarsson

Ráðamenn Universal Hydrogen stefna að því að hefja afhendingu á umbreyttum og vottuðum vetnisknúnum farþegaflugvélum árið 2025. En gætum við séð slíka umbreytingu á vélum Icelandair á næstu árum?

„Hver þróunin verður er auðvitað ekki gott að segja. En þetta er gríðarlega mikilvægur áfangi á þessari vegferð. Það hefur verið talað um það að vetnisflug á þessum áratug sé raunhæfur möguleiki,“ svarar Heiða Njóla Guðbrandsdóttir.

Hér má sjá frétt Stöðvar 2:

Fulltrúi Universal Hydrogen kynnti verkefnið á Hringborði norðurslóða í Reykjavík í október í haust, sem sjá má í þessari frétt:

Fréttir af flugi Icelandair Orkuskipti Loftslagsmál Umhverfismál Orkumál Landhelgisgæslan

Tengdar fréttir

Innanlandsvélar Icelandair gætu verið knúnar vetni eftir þrjú ár

Tækni til að umbreyta olíuknúnum innanlandsflota Icelandair í vetnisknúnar flugvélar verður tilbúin eftir þrjú ár. Þetta kom fram á fundi um orkuskipti í flugi á Reykjavik Edition hótelinu í dag í tengslum við Hringborð norðurslóða.

13. október 2022 22:23

Viljayfirlýsing Icelandair gerir ráð fyrir fimm rafknúnum flugvélum

Icelandair gerir ráð fyrir að fá fimm rafmagnsflugvélar í innanlandsflugið í viljayfirlýsingu, sem félagið skrifaði undir í síðustu viku. Ráðamenn Icelandair telja raunhæft að orkuskiptin í farþegafluginu hefjist fyrir lok þessa áratugar.

22. september 2022 22:22

Forsetinn fyrstur farþega í rafmagnsflugvél

Blað var brotið í íslenskri flugsögu í gær með fyrsta farþegaflugi rafmagnsflugvélar hér á landi. Forseti Íslands og forsætisráðherra voru fyrstu farþegar vélarinnar og segja flugið marka vatnaskil í vegferð Íslands í átt að hreinni orku í loftsamgöngum.

24. ágúst 2022 06:30

Flugvél flýgur í fyrsta sinn í sögunni á íslenskri raforku

Fyrsta rafmagnsflugvél Íslendinga hóf sig til flugs í fyrsta sinn á Íslandi nú síðdegis frá flugvellinum á Hellu á Rangárvöllum. Þetta var jafnframt í fyrsta sinn sem flugvél flaug á íslenskri orku en ekki innfluttu jarðefnaeldsneyti.

8. júlí 2022 22:33