„Það getur verið gott veður en kílómetra lengra er það snarvitlaust“

Almannavarnadeild ríkislögreglustjóra lýsti yfir óvissustigi í gærkvöldi vegna veðurs á Vestfjörðum sem og á Norðurlandi eystra og Norðurlandi vestra í dag, þar sem appelsínugular viðvaranir eru í gildi. Spáð er sunnan stormi og miklu roki en í athugasemdum veðurfræðings hjá Vegagerðinni kemur fram að sviptivindar geti náð allt að 50 metrum á sekúndu.

Samráðsfundur almannavarna fór fram klukkan ellefu en samhæfingarstöð var virkjuð klukkan tíu vegna málsins. Víðir Reynisson, sviðsstjóri almannavarnadeildar, segir spár vera að ganga eftir en er sjálfur á Húsavík í miðju stormsins.

„Það sem við höfum svolitlar áhyggjur af er hversu staðbundið þetta virðist vera. Á eiginlega öllu svæðinu sem að viðvaranirnar gilda um getur fólk verið í bara mjög fínum aðstæðum á einum stað og svo koma bara byljóttar hviður annars staðar,“ segir Víðir.

„Þannig menn þurfa að vera nokkuð staðkunnugir ef menn ætla að vera á ferðinni og fylgjast vel með þeim upplýsingum sem er verið að birta bara hjá Veðurstofunni og Vegagerðin því að þetta virðist vera þannig, eins og ég segi, að það þarf ekki að fara langt til þess að vera kominn í allt aðrar aðstæður,“ segir hann enn fremur. „Það getur verið gott veður en síðan bara kílómetra lengra er það snarvitlaust.“

Fylgjast með tökum á Dalvík

Hætta er á foktjóni en viðbragðsaðilar eru vel undirbúnir og fóru meðal annars til Dalvíkur, þar sem tökur fyrir sjónvarpsþættina True Detective fara fram um þessar mundir.

„Þarna er mikið af bráðabirgðamannvirkjum, hjólhýsum og öðru slíku. Í samstarfi við þau fyrirtæki sem eru í þeirri starfsemi þá voru viðbragðsaðilar með þeim í gær og eru með þeim í dag til að vera viðbúin ef að veðrið verður mjög slæmt þar, sem að gæti einmitt alveg verið,“ segir Víðir.

Ekkert ferðaveður er á svæðunum og búast má við samgöngutruflunum, bæði vegna vinds og hálku. Fólk er hvatt til að bíða með allar ferðir á meðan það versta gengur yfir en það varir sem betur fer ekki lengi.

„Seinni partinn í dag verður þetta orðið miklu skárra, það verður auðvitað vindur áfram en aðstæður verða allt aðrar seinni partinn. En síðan eru lægðirnar bara að koma í röðum, önnur stór er væntanleg á þriðjudaginn, þannig það er stutt á milli núna,“ segir Víðir.

Vona að spáin um möguleg flóð gangi ekki eftir

Þá er óvissustig á sunnanverðum Vestfjörðum vegna ofanflóðahættu en úrkoman sem spáð var í dag er svipuð því sem var þann 26. janúar þegar krapaflóð féllu ofan Patreksfjarðar, Bíldudals og í Arnarfirði.

Ekki var gripið til rýminga í dag en biðlað var til fólks að sýna aðgát, sérstaklega nærri þeim svæðum sem flóð féllu síðast. Þórdís Sif Sigurðardóttir, bæjarstjóri Vesturbyggðar, segir alla meðvitaða um stöðuna.

„Það var sem sagt gengið í hús og talað við það fólk sem að er þarna nálægt árfarveginum við Geirsárgil og rætt við þau um einmitt þetta, að vera ekki í kjöllurum þar sem það er gluggi upp í hlíðina og bara fara að öllu með gát,“ segir Þórdís.

Veðrið þar virðist þó betra núna en fyrst var spáð auk þess sem lítill snjór er í fjöllunum og því líkur á að flóð, ef það verður, verði lítið. 

Reyna að fá fjármagn í ofanflóðavarnir

Hún telur að fólk sé ekki skelkað að þessu sinni en það sé þó enn að vinna úr sínum málum eftir að síðasta flóð féll.

„Það var náttúrulega engin áfallahjálp eða áfallastreituröskunarhjálp eða neitt slíkt á þessum tíma þegar það féll, en það er búið að bæta mjög úr öllum svona viðbúnaði eða aðbúnaði fólks eftir þetta,“ segir Þórdís.

Heilt yfir þurfi að bæta ofanflóðavarnir.

„Það er náttúrulega ekki gott að það sé einhver hætta á flóðum úr Geirshöfðagilinu og öðrum gilum hérna á svæðinu og við vinnum auðvitað að því með Ofanflóðasjóði að reyna að fá fjármagn í þessi verkefni sem að eru mikilvæg,“ segir Þórdís.

Hún vonast til að vel verði tekið í það og gerir í raun ráð fyrir því í ljósi þess að ríkisstjórnin hefur talað um að bæta ofanflóðavarnir. Þau muni nú eiga samtal við ráðherra um hvernig sé hægt að gera ráðstafanir sem fyrst.