Viktor Gísli Hallgrímsson fékk fyrsta tækifærið í byrjunarliðinu á mótinu og varði frábærlega allan leikinn. Gaman að sjá þennan efnilega markvörð sýna hvað hann getur.
Viktor var bestur en það voru margir leikmenn í íslenska liðinu sem voru að spila frábærlega. Óðinn Þór Ríkharðsson kom inn með ellefu mörk á sínum fyrstu mínútum á mótinu og Bjarki Már Elísson hélt áfram að spila stórkostlega.
Guðmundur Guðmundsson þjálfari gerði þetta líka mjög vel. Hann setti leikinn vel upp, nýtti mannskapinn vel og gat líka hvílt lykilmenn sem boðar gott fyrir framhaldið.
Líkt og áður þá gefur íþróttadeild Vísis og Stöðvar tvö leikmönnum og þjálfaranum einkunnir fyrir frammistöðu sína.
Leikmenn og þjálfarar fá einkunn á bilinu 1-6 með umsögn, en neðst í fréttinni má sjá hvað hver einkunn þýðir.
Einkunnir Íslands gegn Suður-Kóreu:
- Byrjunarlið Íslands í leiknum -
Viktor Gísli Hallgrímsson, mark - 5 (26 varin skot- 58:50 mín.) Efnilegasti markvörður heims átti afbragðsgóðan leik og í raun nauðsynlegt fyrir hann upp á framhaldið. Ekki síst fyrir sjálfstraustið sem þarf að vera í farteskinu þegar lengra líður á keppnina. Frábær innkoma.
Bjarki Már Elísson, vinstra horn - 5 (8 mörk - 40:19 mín.) Verið jafnbesti leikmaður Íslands allt mótið. Virkar einbeittur og tilbúinn í slaginn. Ótrúlega mikilvægur þessu íslenska liði. Á þessa stöðu í liðinu algjörlega skuldlaust. Ekki hægt að kvarta yfir hans frammistöðu.
Aron Pálmarsson, vinstri skytta - 3 (2 mörk - 23:10 mín.) Vildi gefa tóninn í leiknum sem er jákvætt. Hugsaði meira um liðsfélaga sína en sjálfan sig. Ávallt sterkur varnarlega og auðvitað vonumst við til og bíðum eftir stórleiknum. Hann hlýtur að koma í milliriðlinum í Gautaborg.
Gísli Þorgeir Kristjánsson, leikstjórnandi - 3 (2 mörk - 27:24 mín.) Byrjaði ekkert sérstaklega vel en vann sig síðan hægt og bítandi inn í leikinn. Skilaði fínu verki fyrir liðið. Hefur hins vegar enn ekki náð að glansa í gegn á mótinu. Leikmaður með leikskilning upp á tíu og vonandi nær hann að galdra fram sinn besta leik í framhaldinu. Íslenska þarf svo sannarlega á honum að halda í toppstandi og þá eigum við eins og hann hefur leikið með Magdeburg.
Viggó Kristjánsson, hægri skytta - 4 (6 mörk - 58:53 mín.) Átti skínandi fínan leik. Skoraði sex góð mörk og mataði félaga sína með frábærum stoðsendingum en tæknifeilarnir í leiknum voru því miður of margir. Varnarlega stóð hann vaktina vel og er leikmaður sem vel er hægt að treysta þegar Ómar Ingi er fjarverandi.
Óðinn Þór Ríkharðsson, hægra horn - 5 (11 mörk - 58:34 mín.) Átti frábæran leik. Ótrúlega fljótur fram völlinn og með afburðar skottækni. Markgráðugur með afbrigðum og engu líka en að Valdimar Grímsson sé endurborinn í íslenska landsliðinu. Ótrúlega líkir leikmenn og þar ekki slæmum að líkjast.
Elliði Snær Viðarsson, lína - 4 (2 mörk - 31:09 mín.) Nýtti færin sín vel á línunni. Varnarlega traustur og ljóst að vera hans í þýsku úrvalsdeildinni í vetur hefur gert hann að mun betri leikmanni en hann var. Smitar út frá sér á vellinum og gefur íslenska liðinu jákvæða orku.
Ýmir Örn Gíslason, lína - 3 (2 stopp - 22:37 mín.) Ýmir Örn hefur oft leikið betur en á þessu móti. Skilar í raun alltaf sínu. Var í vandræðum með litla og kvika andstæðinga en gerði vel. Vonandi nær hann að galdra fram stórleiki í framhaldinu en við þurfum svo sannarlega á góðum varnarleik að halda ætli íslenska liðið sér í átta liða úrslit.
- Menn sem komu inn af bekknum í leiknum -
Janus Daði Smárason, leikstjórnandi - 4 (4 mörk - 18:17 mín.) Frábær innkoma hjá Janusi. Var með hundrað prósent skotnýtingu og spilaði fyrst og síðast fyrir liðið. Gerði hluti sem hann er bestur í. Ótrúlega hæfileikaríkur og virkar í fínu standi. Sterkur og kvikur.
Arnar Freyr Arnarsson, vörn - 4 (2 mörk - 32:22 mín.) Fékk loksins tækifæri og hefur leikið gríðarlega vel með Melsungen í Þýskalandi í vetur. Var grimmur og sterkur varnarlega og skilaði tveimur frábærum mörkum.
Ólafur Guðmundsson, vinstri skytta - 3 (0 mörk - 22:52 mín.) Ólafur var sem fyrr sterkur í varnarleiknum og nánast hnökralaus. Mun væntanlega ekki nýtast íslenska liðinu í sókninni eins og hann gerði þegar hann var upp á sitt besta. Veit upp á hár hvert hlutverk hans er sem er afar jákvætt ekki síst fyrir liðið.
Elvar Ásgeirsson, vinstri skytta - 3 (1 mark - 10:35 mín.) Fékk loksins tækifærið en þarna er maðurinn sem stal senunni á Evrópumótinu þegar hann kom bakdyramegin inn. Sterkur varnarlega og sóknarlega nýtist hann einnig mjög vel. Til þess að við sjáum meira af honum þarf hann fleiri mínútur og tækifæri. Góð viðbót við gott íslenskt landslið.
Hákon Daði Styrmisson, vinstra horn - 3 (0 mörk - 14:58 mín.) Lék sinn fyrsta leik á stóra sviðinu en fékk ekki úr miklu að moða. Vonandi fáum við að sjá meira að honum en það er ekkert grín að keppa við Bjarka Má Elísson sem í dag er einn besti leikmaðurinn í sinni stöðu í heiminum.
Björgvin Páll Gústavsson , mark - spilaði ekki
Ómar Ingi Magnússon, hægri skytta - spilaði ekki
Sigvaldi Guðjónsson, hægra horn - spilaði ekki
Guðmundur Guðmundsson, þjálfari - 5 Eftir mikla gagnrýni eftir Ungverjaleikinn þá mætti Guðmundur galvaskur til leiks. Það er ekki einfalt mál að undirbúa lið gegn andstæðingi eins og Suður-Kóreu en það gerði landsliðsþjálfarinn svo sannarlega. Það var í raun sama hvert var litið, handbragðið á liðinu var afar gott, einbeiting og grimmd og um fram allt lausnir. Afar vel gert.
Útskýring á einkunnum:
6 - Heimsklassa frammistaða
5 - Frábær frammistaða
4 - Góð frammistaða
3 - Sæmileg frammistaða - skilaði sínu
2 - Ekki nógu góð frammistaða
1 - Slakur leikur
