Sagður hafa viljað lög­reglu­búning fyrir skot­á­rás

Landsréttur felldi gæsluvarðhaldsúrskurð yfir mönnunum úr gildi í dag og eru þeir því frjálsir ferða sinna í bili. Í úrskurði Landsréttar var vísað hvort tveggja vísað til ítarlegrar matsgerðar og að ekki væri talið að árás væri yfirvofandi, eða mjög líkleg, eins og áskilið er samkvæmt lagaákvæðinu sem krafa ákæruvaldsins var byggð á.

Vísir hefur ákæru héraðssaksóknara fyrir meint brot undir höndum.

Lögregluskilríki og lögreglubúningur

Annar mannanna virðist hafa verið höfuðpaur í meintri tilraun til hryðjuverka. Hann er ákærður fyrir að hafa ákveðið að valda ótilgreindum hópi fólks bana eða stórfelldu líkamstjóni og er talinn hafa sýnt ásetning ótvírætt í verki. Þess til stuðnings eru samskipti á dulkóðaða samskiptaforritinu Signal.

Í ákæruliðnum, sem varðar hryðjuverkatilraunina, kemur einnig fram að ákærði hafi keypt riffla af gerðinni AK-47, AR-15, sem hann á að hafa breytt í hálfsjálfvirka riffla. Þá hafi hann tileinkað sér efni frá þekktum aðilum sem hafa framið hryðjuverk og aflað sér upplýsinga um sprengju- og drónagerð.

Enn fremur kemur fram að hann hafi reynt að verða sér úti um lögregluskilríki, lögreglufatnað og annan lögreglubúnað til að reyna að villa um fyrir fólki í tengslum við skotárás. Í ákærunni segir að lögregla hafi stöðvað áform hans þegar hann var handtekinn 13. og 21. september 2022.

Hafi haft uppi hvatningarorð og undirróður

Hinn ákærðu er ákærður fyrir hlutdeild í brotinu, með því að hafa bæði í orði og verki, haft uppi hvatningarorð og undirróður, sent upplýsingar til höfuðpaursins um þekkta hryðjuverkamenn, hugmyndafræði þeirra auk verknaðaraðferða.

Þá er hann einnig sakaður um að hafa tekið þátt í framleiðslu þrívíddarprentaðra skotvopna, íhluti í slík skotvopn og skotfæri, allt til að styrkja ásetning og áform hins ákærða, þar til hann var ákærður 21. september síðastliðinn.

Eins og fyrr segir felldi Landsréttur gæsluvarðhaldsúrskurðinn úr gildi í dag en mennirnir höfðu verið í gæsluvarðhaldi síðan í september.

Sveinn Andri Sveinsson, lögmaður annars mannanna, hefur áður sagt að mennirnir hafi gengist við vopnalagabroti. Meinta tilraunin til hryðjuverka sé á engu reist, aðeins hafi verið um spjall þeirra á milli að ræða og „misheppnað grín.“

AK-47, AR-15 og CZ577

Vopnalagabrotin eru fjölmörg samkvæmt ákærunni. Báðir eru kærðir fyrir stórfellt vopnalagabrot, fyrir að hafa í sameiningu framleitt þrívíddarprentuð vopn og íhluti í slík skotvopn, selt að minnsta kosti sex slík vopn til ótilgreindra manna, auk skotfæra, og í einu tilfelli hljóðdeyfi. Þá hafi þeir einnig selt íhluti í skotvopn af gerðinni AR-15, í þeim tilgangi að hægt væri að breyta vopninu í hálfsjálfvirkan riffil.

Annar þeirra er enn fremur ákærður fyrir að hafa haft riffla af gerðinni AK-47, AR-15 og CZ577 í fórum sínum, en rifflarnir fundust við húsleit á heimili ákærða. Hann á að hafa breytt að minnsta kosti einum rifflanna í hálfsjálfvirkan riffil. Þá á hann einnig að hafa annast kaup nafngreinds manns á Glock-skammbyssu af byssusala án heimildar og keypt hundruð skotfæra í umrædd skotvopn.

Meðal þess sem á að hafa fundist við húsleit voru þrívíddarprentaðir íhlutir í byssur, skotfæri, hnífur með löngu blaði, hnúajárn og rafbyssa. Vopnin fundust bæði á heimili ákærða og á heimili móður hans, að því er fram kemur í ákærunni.

Ein og hálf milljón í reiðufé

Hinn ákærðu er sagður hafa haft þrívíddarprentuð skotvopn í fórum sínum, keypt skotfæri í AR-15 og AK-47 riffla og haft slík vopn í fórum sínum, sem fundust við húsleit. Við húsleitina fundust einnig þrívíddarprentaðir íhlutir, skotfæri og loftskammbyssa. Þá er hann einnig ákærður fyrir fíkniefnalagabrot en við húsleitina fundust 7,45 grömm af marijúana, 0,48 grömm af amfetamíni auk anabólískra stera.

Lögregla krafðist alls upptöku á rúmri 1,5 milljón í reiðufé, fjórum þrívíddarprenturum, skotfærum, íhlutum í skotvopn, verkfærum til vopnagerðar, rifflum og fíkniefnum. Refsiákvæðin sem undir eru í málinu fyrir tilraun til hryðjuverka varða við tiltekna töluliði 1. mgr. 100. gr. almennra hegningarlaga. Refsing getur numið allt að ævilöngu fangelsi. Þá er einnig vísað til fjölmargra ákvæða í vopnalögum og laga um ávana- og fíkniefni.