Þagnar­­­skyldu­­­samningar, þrá­látar beiðnir um kyn­líf og meint kyn­­ferðis­brot

Í ítarlegri grein á vef New York Times er tekið fram að yfir 17 mánaða tímabil hafi hinn 26 ára leikstjórnandi, sem þá lék með Houston Texans, hitt 66 konur - að því er vitað - til að fá nudd. Þegar á staðinn var komið mun Watson hafa reynt að sannfæra konurnar um að stunda með sér kynlíf og jafnvel þvingað þær til þess.

Alls hafa 24 konur í Texas-ríki höfðað einkamál gegn leikmanninum. Til þessa hefur leikmaðurinn ekki verið kærður en talið er að ekki verði dæmt í málinu fyrr en eftir að NFL-leiktíðinni lýkur í febrúar á næsta ári.

Rannsókn NY Times á málinu hefur leitt ýmislegt í ljós. Ásamt því sem kemur fram hér að ofan þá er staðfest að Houston Texans hafi aðstoðað þáverandi leikstjórnanda sinn. Var Watson með aðstöðu á The Houstonian, hóteli sem Houston Texans dvelur reglulega á. Einnig var hann oftar skráður undir öðru nafni, til að mynda á nafni starfsmanna félagsins.

Öryggisfulltrúi félagsins skaffaði svo þagnarskyldusamninga eftir að ein þeirra sem Watson hafið áreitt hótaði að koma upp um hann á samfélagsmiðlum. Félagið tekur fyrir að hafa vitað af hegðun leikmannsins fyrr en í mars 2021. Síðan hafi það aðstoðað við rannsókn málsins og muni halda því áfram.

Rusty Hardin, lögfræðingur leikmannsins, segir skjólstæðing sinn neita öllum ásökunum sem fram koma. Þá neitaði Hardin að svara spurningum NY Times.

Stóra spurningin er hvað NFL-deildin aðhefst í málinu en um er að ræða leikmann sem skrifaði nýverið undir fimm ára samning við Cleveland Browns upp á 230 milljónir Bandaríkjadala. Samsvarar það nærri 30 milljörðum íslenskra króna. Talsmaður Cleveland Browns vildi ekki tjá sig um málið og þá vildi talsmaður deildarinnar heldur ekki tjá sig samkvæmt frétt NY Times. 

Sannkallaður Gulldrengur í upphafi

Áður en Watson var valinn í nýliðavalinu árið 2017 þá hafði hann unnið titla með Gainesville High School og Clemson-háskóla. Mörg NFL-lið töldu hann líklegan til afreka og þá hjálpaði hans flekklausa ímynd á þeim tíma til.

Síðan ásakanirnar komu fyrst upp á yfirborðið á síðasta ári hefur þeim aðeins fjölgað. Þær eru jafn mismunandi og þær eru margar. Watson bað suma nuddara um að stinga fingur upp í endaþarm sinn, aðra að eiga við sig munnmörk, nudda á sér getnaðarliminn eða stunda með sér kynmök. 

Sumar segja hann hafa þvingað þær til samræðis eða einfaldlega ekki vitað hvernig þær áttu að segja nei þegar hann byrjaði.

Sumar af konunum 66 sem hittu Watson undir því yfirskini að honum vantaði nudd frá október 2019 til mars 2021 segja ekkert í hegðun hans hafa verið óþægilegt né truflandi. Alls hafa hins vegar 24 lagt fram kæru þó fleiri hafi slæma sögu að segja. Ein kona hefur dregið kæruna sína til baka og tvær aðeins kvartað yfir hegðun leikmannsins frekar en að kæra hann.

Rannsókn NY Times sýnir fram á hversu mikla vinnu Watson lagði á sig til að sannfæra konurnar um að hann væri traustsins verður. Hann herjaði á svartar konur og sagðist vilja styrkja fyrirtæki sem væru rekin af svörtu fólki.

Er Watson gaf vitnisburð um málið var hann spurður hvort hann hefði á einhverjum tímapunkti spurt konurnar út í starfsreynslu þeirra eða hvort þær væru með leyfi til að starfa sem nuddarar í Texas-ríki. Leikmaðurinn sagði það ekki hafa verið forgangsatriði hjá sér. Hann hafi bara viljað komast í nudd.

Kærðu ekki þó hann hafi ítrekað beðið um kynlíf

Eins og áður sagði hitti Watson alls 66 konur er vitað er um á á þessum 17 mánuðum. Þó flestar þeirra hafi hvorki kært né lagt fram kvörtun þá hafa nær allar staðfest að hann hafi viljað kynlíf á einhverjum tímapunkti.

Ein kona staðfesti að Watson hefði reynt að eiga frumkvæði að kynlífi í öll þrjú skiptin sem þau hittust. Hún hafi þó ekki kært. Önnur sagði að hann hefði beðið hana um að nudda svæðið á milli pungs og endaþarms.

Hún hafi hlegið en hann hafi rifið í hendi hennar og sett hana á svæðið sem um er ræðir. Konan sagði að Watson hefði tvívegis átt frumkvæðið að kynlífi. „Ég vissi ekki hvernig ég átti að neita honum,“ sagði hún.

Rusty Hardin, lögfræðingur Watson, staðfestir að leikmaðurinn hafi stundað kynlíf með þremur af þeim 66 konum sem NY Times veit að hann hitti á þessum tíma. Samkvæmt Hardin átti kynlífið sér stað eftir að nuddi var lokið og áttu þær frumkvæðið.

Borgaði fimm þúsund Bandaríkjadali

Í júní 2020 hóf Watson reglulegar heimsóknir í heilsulindina A New U Spa sem Dionne Louis rak. Í kjölfarið hitti hann þó nokkrar konur þar sem áttu að gefa honum nudd en nær alltaf reyndi Watson að fá meira frá þeim hefðbundið nudd.

Louis vissi af hegðun leikmannsins en lét það sem vind um eyru þjóta þar sem hann borgaði henni ríflega. Til að mynda lagði Watson fimm þúsund Bandaríkjadali inn á Louis. Átti peningurinn að fara í ný tæki og tól fyrir heilsulindina.

Þær konur sem Louis sendi að nudda leikstjórnandann höfðu ekki tiltekin leyfi til að flokkast sem nuddarar í Texas-fylki. Ein af konunum hefur staðfest að Watson hafi þrálátlega beðið hana um munnmök. Hann hafi sýnt henni getnaðarlim sinn í fullri reisn í kjölfarið.

Umrædd kona ákvað ekki að kæra Watson en fjórar aðrar sem unnu fyrir A New U Spa gerðu það. Þær sögðu allar að Louis hafi veitt honum sérstaka athygli. Hvorki Louis né lögfræðingur hennar svöruðu fyrirspurnum NY Times.

Næsta tímabil

Watson hefur verið að skjótast á milli Cleveland – þar sem hann hefur verið við æfingar – og Houston þar sem hann hefur rætt við rannsakendur NFL-deildarinnar og gefið vitnisburð um málið. 

Ekki er talið að einkamálin fari fyrir dómara fyrr en eftir að tímabilinu lýkur á næsta ári en það er þó alls óvíst hvort Watson muni spila fyrir Cleveland. Leikmaðurinn heldur því þó enn fram að hann hafi ekki gert neitt rangt.

„Ég veit það ekki. Eins og ég sagði þér í upphafi á þessum vitnisburði þá er ég enn að reyna átta mig á þeim aðstæðum sem við erum í núna, af hverju ég er að tala við ykkur og af hverju þið eruð að tala við mig. Ég veit það hreinlega ekki.“