Fimm hundruð dagar síðan Keflavík tapaði síðast á heimavelli

Óskar Ófeigur Jónsson skrifar 7. júní 2021 16:00

Keflvíkingar hafa unnið alla heimaleika sína síðan fyrir að kórónuveiran tók yfir heiminn. Vísir/Hulda Margrét

KR-ingar berjast í kvöld fyrir lífi sínu á gólfinu þar sem aðeins eitt lið hefur fagnað sigri undanfarna sextán mánuði.

Deildarmeisturum Keflavíkur vantar aðeins einn sigur í viðbót til að enda sjö ára sigurgöngu KR-inga í Domino's deildinni og komast sjálfir í lokaúrslit í fyrsta sinn í meira en áratug. Þessi sigur gæti litið dagsins ljós í Blue höllinni í kvöld.

Leikur Keflavíkur og KR hefst klukkan 20.15 og verður sýndur beint á Stöð 2 Sport. Upphitun fyrir leikinn hefst klukkan 19.45 og Domino's Körfuboltakvöld mun síðan gera leikinn upp strax og honum lýkur.

Keflavíkurliðið hefur unnið fimm fyrstu leiki sína í úrslitakeppninni og það er ljóst að verkefni Vesturbæinga er af erfiðari gerðinni. KR-ingar þurfa nú að vinna tvisvar í Blue höllinni í Keflavík þar sem heimamenn í Keflavíkurliðinu hafa unnið sautján leiki í röð og ekki tapað síðan 24. janúar 2020.

Í kvöld eru einmitt liðnir fimm hundruð dagar síðan að Keflavík tapaði síðast á heimavelli sínum en þá komu Stjörnumenn í heimsókn og unnu sex stiga sigur, 83-77.

Keflavík vann síðustu þrjá heimaleiki sína í deildarkeppninni 2019-20, vann síðan alla ellefu heimaleiki sína í deildinni í vetur og hefur unnið þrjá fyrstu heimaleiki sína í úrslitakeppninni.

Keflavíkur hefur unnið ellefu af þessum sautján leikjum með tíu stigum eða meira og þá hefur liðið unnið 51 af 68 leikhlutum í þessum sautján heimasigrum í röð sem gerir 75 prósent leikhlutanna.

Keflavíkurliðið er sérstaklega sterkt í seinni hálfleik þar sem liðið hefur aðeins tapað 4 af 34 leikhlutum sínum síðan í janúar í fyrra.

Sautján leikja sigurganga Keflavíkur í Blue-höllinni:
Naumir sigrar (5 stig eða minna): 1 leikur
Sannfærandi sigrar (6 til 9 stig): 5 leikir
Öruggir sigrar (10 til 19 stig): 5 leikir
Stórsigrar (20 stig eða meira): 6 leikir
-
Gengi Keflavíkur eftir leikhlutum í síðustu sautján heimaleikjum:

1. leikhluti: Unnið 11 af 17 (3 jafnir, 3 tapaðir) Nettó: +50
2. leikhluti: Unnið 12 af 17 (5 tapaðir) Nettó: +48
3. leikhluti: Unnið 14 af 17 (3 tapaðir) Nettó: +113
4. leikhluti: Unnið 14 af 17 (2 jafnir, 1 tapaður) Nettó: +74
Samtals:
Unnir leikhlutar: 51 (75%)
Jafnt: 5 (7%)
Tapaðir leikhlutar: 12 (18%)